Madhuri Elephant Kolhapur Vantara : कोल्हापूरमधील नांदणी गावातील माधुरी उर्फ महादेवी हत्तीणीला गुजरातच्या जामनगरमधील वनतारा संस्थेकडे हस्तांतरित करण्याच्या निर्णयाला सुप्रीम कोर्टात आव्हान देण्यात आले आहे. या प्रकरणाची सुनावणी झाली आहे. राजू शेट्टी यांनी सुनावणीसंबंधित माहिती दिली आहे. माधुरीला कोल्हापुरात परत आणण्याचा मार्ग काही प्रमाणात मोकळा झाल्याचे राजू शेट्टी यांनी म्हटले आहे.

आज सुप्रीम कोर्टामध्ये माधुरी हत्तीणीला कोल्हापुरात, नांदणी मठात परत आणण्याच्या संदर्भातील पूर्वविचार याचिकेची सुनावणी झाली. राज्य सरकार, वनतारा आणि नांदणी मठाने संयुक्तपणे भूमिका मांडली की, नांदणी मठाने वनताराच्या देखरेखीखाली ७-८ एकर जमीन माधुरी हत्तीण आणि अन्य प्राण्यांसाठी उपलब्ध करुन घ्यावी. यावर महाराष्ट्र राज्य सरकार लक्ष ठेवून असेल, असे वक्तव्य राजू शेट्टी यांनी केले आहे.

राजू शेट्टी म्हणाले, 'सुप्रीम कोर्टाने माधुरी हत्तीणीला वनतारामध्ये पाठवण्याचा जो निर्णय देण्यात आला होता. तो बदलून हाय पॉवर कमिटीकडे जाण्याची परवानगी द्यावी आणि हाय पावर कमिटीच्या आदेशानुसार, माधुरी हत्तीणीला नांदणी मठात आणण्यासाठी प्रयत्न करावे यासाठी ही याचिका दाखल करण्यात आली होती. या याचिकेवर आज सुनावणी झाली. सुप्रीम कोर्टाने, हाय पॉवर कमिटीने सर्व परिस्थिती समजून घ्यावी आणि माधुरी हत्तीणीच्या आरोग्याची काळजी घेऊन योग्य तो निर्णय घ्यावा. आता हायकोर्ट आणि सुप्रीम कोर्ट यांचा अडथळा संपला आहे. आता सोमवारी राज्य सरकार, वनतारा आणि नांदणी मठ हे संयुक्तरित्या हाय पॉवर कमिटीकडे अर्ज करतील आणि एका प्रकारे माधुरी हत्तीणीला नांदणी मठात आणण्याचा मार्ग काही अंशी सुकर झाला आहे.'

माधुरी हत्तीण, नांदणी मठ, कोल्हापूर आणि वनतारा या प्रकरणातील सुनावणी आता सोमवारी (१५ सप्टेंबर) होणार आहे. या प्रकरणात हाय पॉवर कमिटी काय निर्णय घेणार याकडे सर्वांचे लक्ष लागले आहे.