विकास काटे, साम प्रतिनिधी

कोल्हापूरमधून एक मोठी बातमी येत आहे. आमदारालाच हनी ट्रॅपमध्ये अडकवण्याचा प्रयत्न झाला. याप्रकरणी पोलिसांनी एका मुलीसह एका तरुणाला अटक केली आहे. अटकेत असलेल्या आरोपी बहीण-भाऊ असल्याची माहिती पोलिसांनी दिली आहे. चंदगड मतदारसंघाचे आमदार शिवाजी पाटील यांना हनी ट्रॅपमध्ये अडकवण्याचा प्रयत्न बहीण-भावाने केल्याचा धक्कादायक प्रकार उघडकीस आला आहे.

या प्रकरणात मांडेदुर्ग गावातील एका बहिण-भावाला ठाणे पोलिसांनी अटक केलीय. पोलिसांच्या माहितीनुसार, मोहन जोतिबा पवार (२६) व त्याची बहिण शामल जोतिबा पवार (२६) अशी या दोघांची नावे आहेत. गेल्या वर्षभरात या दोघांनी आमदार पाटील यांना वेगवेगळ्या मोबाईल क्रमांकांवरून अश्लील चॅट, फोटो आणि व्हिडिओ पाठवून त्रास दिला होता. एवढेच नव्हे तर “राजकीय प्रतिमा मलिन करू” अशी धमकी देत दहा लाख रुपयांची खंडणी मागण्यात आली होती.

आमदार शिवाजी पाटील यांनी सततच्या या त्रासामुळे ८ ऑक्टोबर रोजी ठाण्यातील चितळसर पोलीस ठाण्यात तक्रार नोंदवली. त्यानंतर ठाणे आणि कोल्हापूर पोलिसांनी संयुक्त तपास करून मांडेदुर्ग गावातून दोघांना अटक केली. आरोपी मोहन पवार आणि त्याची बहीण शामल यांनी ‘मैत्रीच्या’ नावाखाली आमदार पाटील यांच्याशी संपर्क साधून, नंतर अश्लील मजकूर पाठवत हनी ट्रॅपचा कट रचला होता. सुरुवातीला आमदारांनी त्रास सहन करून संबंधित नंबर ब्लॉक केले, मात्र आरोपींनी नवीन नंबर वापरून त्रास सुरू ठेवला.

गुन्हा उघड झाल्यानंतर आरोपी मोहन पवार स्वतः आमदारांच्या कार्यालयात हजर होऊन “माझी चूक झाली, माफ करा” अशी विनंती केली, परंतु पोलिसांनी तात्काळ त्याला ताब्यात घेतले. त्याच्या चौकशीत बहिणीचा सहभागही स्पष्ट झाल्याने तिलाही अटक करण्यात आली आहे.