रणजित माजगावकर, कोल्हापूर

Kolhapur Engineering Student Sucide News कोल्हापुरातून धक्कादायक बातमी समोर आली आहे. लक्षतीर्थ वसाहत येथे एका १९ वर्षीय इंजिनिअरिंगच्या विद्यार्थ्याने नैराश्यातून टोकाचे पाऊल उचलत आत्महत्या केल्याची घटना सोमवारी सकाळी उघडकीस आली. वडिलांनी आणि भावाने कॉलेजमध्ये नेवून सोडले नाही म्हणून तरुणाने संतापाच्या भरात हे पाऊल उचलल्याचे म्हटले जात आहे. या घटनेमुळे परिसरात हळहळ व्यक्त होत असून कुटुंबीयांवर दुःखाचा डोंगर कोसळला आहे. साईराज पांडुरंग हुंबे (वय १९) असे आत्महत्या केलेल्या तरुणाचे नाव आहे. तो शहरातील नामंकित कॉलजेमध्ये इंजिनिअरिंगच्या द्वितीय वर्षात शिक्षण घेत होता.

मिळालेल्या प्राथमिक माहितीनुसार, सोमवारी सकाळी वडिलांनी आणि भावाने कॉलेजमध्ये नेवून सोडले नाही, यामुळे साईराज संतापला होता. या किरकोळ कारणातून निर्माण झालेल्या नैराश्यातून त्याने राहत्या घरात छताच्या पंख्याला इलेक्ट्रिकल वायरच्या साहाय्याने गळफास घेत आपले जीवन संपवले.

घटनेची माहिती मिळताच कुटुंबीयांनी तत्काळ धाव घेतली, मात्र तोपर्यंत उशीर झाला होता. या घटनेमुळे कुटुंबीयांना जबर धक्का बसला आहे. लक्ष्मीपुरी पोलीस ठाण्यात या घटनेची नोंद करण्यात आली असून पुढील तपास सुरू आहे. साईराजचे वडील पांडुरंग हुंबे हे खाजगी फर्म आणि व्यावसायिकांकडे बागकामाचे काम करून आपल्या कुटुंबाचा उदरनिर्वाह करतात.

घरची आर्थिक परिस्थिती बेताची असतानाही त्यांनी आपल्या मुलांच्या शिक्षणावर विशेष भर दिला होता. साईराज हा त्यांच्या तीन मुलांपैकी एक असून तो शिक्षणातही चांगली प्रगती करत होता, असे शेजाऱ्यांनी सांगितले. अशा किरकोळ कारणावरून एका तरुणाने जीवन संपवल्याने चिंता व्यक्त होत आहे. विद्यार्थ्यांमधील वाढता ताणतणाव आणि नैराश्य ही गंभीर समस्या बनत चालली असून पालकांनी याकडे लक्ष देणे गरजेचे आहे.