संजय जाधव, साम टीव्ही प्रतिनिधी

खामगाव शहरातील बाळापूर फैल भागात राहणारी निकिता सुनीता दिलीप अवसरमोल हिने अत्यंत कठीण परिस्थितीवर मात करत SSC GD परीक्षा उत्तीर्ण करून केंद्रीय राखीव पोलीस दल (CRPF) मध्ये निवड मिळवली आहे. तिच्या या उल्लेखनीय यशामुळे खामगाव शहरासह संपूर्ण परिसरात आनंदाचे वातावरण निर्माण झाले असून नागरिकांनी वाजत-गाजत मिरवणूक काढत तिच्या यशाचा जल्लोष केला.

निकिताचे कुटुंब सर्वसामान्य परिस्थितीत जीवन जगत असताना शिक्षण आणि स्पर्धा परीक्षांचा प्रवास तिने जिद्द, चिकाटी आणि प्रचंड मेहनतीच्या जोरावर पूर्ण केला. आर्थिक अडचणी, मर्यादित साधनसामग्री आणि अनेक अडथळे असतानाही तिने आपले ध्येय कधीही डोळ्याआड होऊ दिले नाही. नियमित अभ्यास, शिस्तबद्ध दिनक्रम आणि आत्मविश्वासाच्या जोरावर तिने SSC GD सारख्या कठीण परीक्षेत यश संपादन केले.

निकिताच्या निवडीची बातमी समजताच खामगाव शहरात आनंदाची लाट उसळली. परिसरातील नागरिक, नातेवाईक, मित्रपरिवार आणि युवकांनी एकत्र येत तिच्या घरापासून शहरातून ढोल-ताशांच्या गजरात मिरवणूक काढली.

“भारत माता की जय”, “निकिता ताईंचा विजय असो” अशा घोषणांनी परिसर दुमदुमून गेला. फुलांचा वर्षाव, मिठाई वाटप आणि जल्लोषात तिच्या यशाचा आनंद साजरा करण्यात आला.

निकिताच्या घरी शुभेच्छांचा वर्षाव झाला. अनेक मान्यवर, सामाजिक कार्यकर्ते, शिक्षक, युवक आणि महिलांनी प्रत्यक्ष भेट देऊन तिचे अभिनंदन केले. सोशल मीडियावरही तिच्या यशाचे मोठ्या प्रमाणावर कौतुक होत असून ती आज अनेक तरुणींसाठी प्रेरणास्थान ठरत आहे. विशेषतः ग्रामीण व निमशहरी भागातील मुलींसाठी निकिताची यशोगाथा आशेचा किरण ठरत आहे.

आपल्या यशाबद्दल भावना व्यक्त करताना निकिताने सांगितले की, “परिस्थिती कठीण होती, पण कुटुंबाचा आधार, आई-वडिलांचे कष्ट आणि स्वतःवर असलेला विश्वास यामुळे हे यश मिळू शकले. मेहनत आणि संयम ठेवला तर कोणतेही ध्येय अशक्य नाही.” तिने आपल्या यशाचे श्रेय कुटुंबीय, शिक्षक आणि मार्गदर्शकांना दिले.

निकिताची CRPF मध्ये झालेली निवड ही केवळ वैयक्तिक नसून, ती खामगाव शहराच्या शिरपेचातील आणखी एक मानाचा तुरा ठरली आहे. तिच्या या यशामुळे अनेक युवक-युवतींना स्पर्धा परीक्षांची तयारी करण्याची नवी प्रेरणा मिळाली असून “मेहनतीला पर्याय नाही” हा संदेश पुन्हा एकदा ठळकपणे समोर आला आहे.