सचिन कदम, साम टिव्ही

बाप लेकीच्या नात्याला काळिमा फासणारी घटना कर्जतमधून उघडकीस आली आहे. सावत्र बापानंच आठ वर्षांच्या चिमुकलीवर लैंगिक अत्याचार केला आहे. सकाळी आईला ही बाब समजल्यानंतर तिची पायाखालची वाळू सरकली. तिनं थेट नराधम बापाविरोधात पोलीस ठाण्यात तक्रार दाखल केली. ही धक्कादायक घटना कर्जत तालुक्यातील शेलू येथे घडली असून, पोलिसांनी गुन्हा दाखल करून आरोपीला बेड्या ठोकल्या आहेत

कर्जत तालुक्यातील शेलू येथे बापानं केलेल्या कृत्यामुळे परिसरात खळबळ उडाली आहे. जितेंद्र चोपडे असे आरोपीचे आहे. त्याच्याच आठ वर्षांच्या मुलीवर त्याची वाईट नजर होती. घटनेच्या दिवशी चिमुकली आपल्या आई वडिलांसोबत झोपली होती. नंतर सावत्र बापाच्या डोक्यात सैतान घुसला.

त्यानं आपल्या मुलीसोबत दुष्कृत्य करण्यास सुरूवात केली. मुलीच्या आईला सकाळी ही धक्कादायक बाब समजल्यानंतर तिला संताप अनावर झाला. तिनं थेट पोलीस ठाणे गाठले. तसेच नराधम बापाविरोधात तक्रार दाखल केली. तक्रारीनुसार, नेरळ पोलिसांनी घटनेची चौकशी करून आरोपीला बेड्या ठोकल्या.

दरम्यान, पोलिसांनी त्याला अटक करून त्याची कसून चौकशी केली. चौकशी दरम्यान, सावत्र वडील वारंवार चिमुकलीवर लैंगिक अत्याचार करत असल्याची माहिती समोर आली आहे. रात्री झोपेत किंवा पत्नी घरी नसताना नराधम मुलीवर अत्याचार करत असल्याची माहिती समोर आली आहे. या घटनेची माहिती परिसरात पसरताच खळबळ उडाली आहे. सध्या या घटनेचा अधिक तपास पोलिसांकडून सुरू आहे.