अभिजित देशमुख

कल्याण : सणासुदीचे दिवस असल्याने तुपाची मागणी वाढली आहे. यामुळे मोठ्या प्रमाणात तुपाची विक्री होते. याचा फायदा घेत नकली तूप नामांकित ब्रँडच्या नावाखाली विकण्याच्या अनेक घटना उघड होतात. कल्याणमध्ये देखील अशीच एक घटना समोर आली आहे. यात एका महिलेला ताब्यात घेण्यात आले आहे. 

कल्याणच्या (Kalyan) दुर्गाडी परिसरात एक महिला तूप विक्री करत होती. हे तूप बनावटी असल्याचा संशय आहे. सदर महिलेस केडीएमसीच्या अधिकाऱ्यांनी विचारपूस केली असता तिने उडवाउडवीची उत्तरे देत काही सांगण्यास तयारी दर्शविली नाही. विशेष म्हणजे तूपाच्या पॅकेटवर नामांकित कंपनीचे नाव आहे. यामुळे सदर महिलेला केडीएमसी (KDMC) अधिकाऱ्यांनी ताब्यात घेतले आहे. 

कल्याणच्या दुर्गाडी किल्ले परिसरात केडीएमसीच्या अधिकाऱ्यांनी जवळपास ७० किलो बनावटी तूप असल्याचा संशयावर एका महिलेला या तुपासह ताब्यात घेेतले आहे. यानंतर महापालिकेच्या अधिकाऱ्यांनी याची माहिती अन्न आणि औषध प्रशासनास आणि पोलिसांना दिली असून पोलिसांनी पुढील प्रक्रिया सुरू केली आहे. शिवाय अन्न व औषध प्रशासनाने तुपाचे नमुने तपासणीसाठी घेतले आहे.