अभिजित देशमुख
कल्याण : मुंबईत उद्धव ठाकरे यांचे निवासस्थान मातोश्री बाहेर मराठा आंदोलकांनी आंदोलन केले. या आंदोलनात कल्याणमधील भाजप पदाधिकारी सुशील पायाळ सहभागी झाल्याचे दिसून आले. यामुळे ठाकरे गट आक्रमक झाल्याने राजकीय वातावरण चांगलेच तापले होते. 

मातोश्री बाहेर करण्यात आलेल्या मराठा आंदोलनात कल्याणमधील (BJP) भाजप पदाधिकारी सहभागी असल्याचे पाहण्यास मिळाले. या आंदोलनात भाजपचे कार्यकर्ते असल्याचा आरोप ठाकरे गटाचे कल्याण जिल्हा समनव्यक हर्षवर्धन पालांडे यांनी केला होता. याबाबत आज ठाकरे गटाच्या पदाधिकार्यांनी (Kalyan) कल्याणचे डीसीपी सचिन गुंजाळ यांची भेट घेतली. यावेळी विधानसभा, महापालिका निवडणुकीच्या पार्श्वभूमीवर काही अनुचित प्रकार घडू नये, आंदोलनात असे घुसखोर या संधीचा फायदा घेऊन मराठा आरक्षणाच्या आंदोलनाला गालबोट लावण्याचा प्रयत्न करत असल्याचे ठाकरे गटाकडून सांगण्यात आले. 

कारवाई करण्याची मागणी 

ठाकरे गटाचे पदाधिकारी आक्रमक झाले असून मातोश्रीला बदनाम करण्याचे षडयंत्र भाजप करत आहे हे सिद्ध होतं. त्या आंदोलनात कोण होते, ते मराठा आंदोलक होते का? ते भाजपचे होते का? त्यामागे मुख्य सूत्रधार कोण आहे? याचा शोध घेऊन कारवाई करावी; अशा मागणीचे निवेदन पोलिसांना दिले आहे .