समृद्धी महामार्गावर झालेल्या या भीषण अपघाताचा संबंध थेट खरात प्रकरणाशी आहे...कारण याच कार अपघातात मृत्यू झालाय तो भोंदू अशोक खरातचे निकटवर्तीय आणि खरातच्या शिवनिका ट्रस्टचे उपाध्यक्ष डॉ. जितेंद्र शेळकेंचा.. समृद्धी महामार्गावर रस्त्याच्या कडेला उभ्या असलेल्या एका कंटेनरला शेळके यांच्या कारनं पाठीमागून जोरदार धडक दिली. धडक इतकी भीषण होती की, कारचा चक्काचूर झाला..

यात शेळके आणि त्यांच्या पत्नीचा जागीच मृत्यू झालाय. तर मुलगा गंभीर जखमी झाला असून त्याच्यावर उपचारा सुरू आहे. शेळके हे खरातच्या सर्व व्यवहारांचे साक्षीदार होते. आणि त्यामुळेच त्यांचा घातपात केला का असा संशय व्यक्त केला जातोय. दरम्यान खरात प्रकरणातील साक्षीदारांना संपवण्याचा प्रयत्न केला जात असल्याचा आरोप करण्यात आलाय. तर शेळकेंनंतर आता खरातही संपवलं जाऊ शकतं असा संशय सुषमा अंधारेंनी व्यक्त केलाय.

दुसरीकडे मध्य प्रदेशातल्या व्यापम घोटाळ्यात ज्यापद्धतीनं साक्षीदारांना संपवण्यात आलं होतं, तोच प्रकार खरात प्रकरणात सुरु असल्याचा संशय काहींनी उपस्थित केलाय. मात्र जितेंद्र शेळकेंच्या अपघाती मृत्यूनंतर ट्रस्टवरील इतर विश्वस्तांच्या सुरक्षेचं मोठं आव्हानं पोलीस प्रशासनासमोर आहे... खरातच्या ट्रस्टमध्ये कोणाकोणाचा सहभाग होता.

खरातच्या शिवनिका ट्रस्टचे विश्वस्त

अशोक खरात अध्यक्ष

डॉ. जितेंद्र शेळके उपाध्यक्ष

कल्पना खरात सरचिटणीस

रुपाली चाकणकर सदस्या

सुभाषराव गमे सदस्य

ललित पोफळे(C.A) सदस्य

नंदकिशोर कातोरे सदस्य

दुसरीकडे उपाध्यक्षांच्या अपघाती मृत्यूचा सखोल तपास करणार असल्याची माहिती पोलिसांनी दिलीय. जितेंद्र शेळके हे शिर्डी येथील महत्त्वाच्या जमीन घोटाळ्यातील प्रमुख साक्षीदार होते. खरात प्रकरणात शेळकेही तणावात असल्याची चर्चा असतानाच त्याच्या अपघाती मृत्यवर संशय व्यक्त केला जातोय. त्यामुळे पोलिसांनी या प्रकरणाचा 'अपघात' आणि 'घातपात' अशा दोन्ही बाजूंनी तपास करणं गरजेचं आहे.अन्यथा बड्यांना वाचवण्यासाठी वर्षानुवर्ष चालणारी घातपाताची सत्र अशीच सुरु राहतील.