'माझ्या पाठीशी देवा भाऊ आहेत. माझं कुणीही वाकडं करू शकत नाही', असं वक्तव्य करत ग्रामविकास मंत्री जयकुमार गोरे यांनी थेट विरोधकांना इशारा दिला. एका महिलेच्या प्रकरणावरून सध्या जयकुमार गोरे चर्चेत आहेत. अशामध्ये त्यांनी हे विधान केले आहे त्यामुळे ते पुन्हा चर्चेत आले आहेत. 'कुणी कितीही काळ्या भावल्या बांधा. माय माऊली आणि जनता माझ्यासोबत आहे.' असं जयकुमार गोरे यांनी सांगितले. जयकुमार गोरे यांच्या या धक्कादायक विधानामुळे राजकीय वर्तुळात मोठी खळबळ उडाली आहे.

एका महिलेला नग्न फोटो पाठविल्याच्या आरोपावरून वादात सापडलेल्या ग्रामविकास मंत्री जयकुमार गोरे यांनी तुफानी टोलेबाजी करत आपल्यावरील आरोपांना जोरदार उत्तर दिले. 'माझी एकही निवडणूक अशी गेली नाही ज्यामध्ये माझ्याविरोधात केस झाली नाही. मला अडवण्यासाठी गावातले जिल्ह्यातले काही लोक सकाळ- संध्याकाळ नदीच्या किनारी जाऊन पूजा बांधतात आणि काळया भावल्या बांधत आलेत . मात्र जोपर्यंत जनता आणि माता भगिनी माझ्यासोबत आहेत तोपर्यंत तुम्ही कितीही पूजा केल्या आणि कितीही बाहुल्या बांधल्या तरी माझे कोणीही काहीही वाकडे करू शकत नाही.' असा इशारा जयकुमार गोरे यांनी दिला.

माळशिरस तालुक्यातील पिलीव येथे भाजपच्या शाखा उद्घाटन समारंभात शनिवारी रात्री जयकुमार गोरे बोलत होते. या कार्यक्रमात गोरे यांनी मोहिते पाटील यांना दे धक्का देत पिलीव येथील माजी जिल्हा परिषद सदस्य गणेश पाटील, सरपंच नितीन मोहिते आणि मोहिते गटाचे शेकडो पदाधिकारी आणि कार्यकर्त्यांना भाजपमध्ये प्रवेश केला. यावेळी माढ्याचे माजी खासदार रणजीत निंबाळकर आणि माळशिरसचे माजी आमदार राम सातपुते उपस्थित होते.