सांगली : राज्यात अतिवृष्टीमुळे शेतकऱ्यांना मोठा फटका बसला आहे. या कठीण काळात शेतकऱ्यांना सरकारकडून मदतीची अपेक्षा आहे. विरोधकही शेतकऱ्यांना मदतीची मागणी करत आहेत. राज्यातील परिस्थिती पाहता ओला दुष्काळ (Wet Drought) जाहीर करण्याची मागणी जोर धरु लागली आहे. राष्ट्रवादीचे प्रदेशाध्यक्ष जयंत पाटलांनीही (Jayant Patil) आता अशीच मागणी केली आहे.

अतिवृष्टीमुळे मोठ्या प्रमाणात शेतकऱ्यांचे नुकसान झाले असून या शेतकऱ्यांना मदत देण्याची सरकार टाळाटाळ करत आहे. त्यामुळे आता तरी सरकारने तात्काळ ओला दुष्काळ जाहीर करावा अशी, मागणी जयंत पाटील यांनी केली आहे. (Latest News Update)

पंचनाम्यानंतर कॅबिनेटमध्ये मदतीचा निर्णय

पंचनाम्यानंतरच कॅबिनेटमध्ये शेतकऱ्यांच्या मदतीचा निर्णय घेण्यात येईल अशी माहिती अब्दुल सत्तार यांनी दिली आहे. अतिवृष्टीमुळे शेती पिकांचं मोठं नुकसान झालं आहे. त्यामुळे शेतकऱ्यांनी हेक्टरी 75 हजार रुपयांची मागणी केली आहे. मात्र अद्याप संपूर्ण पंचनामे झाले नसून पुढच्या एक आठवड्यात संपूर्ण पंचनामे होतील. त्यानंतर जिल्ह्याजिल्ह्यातून त्याचा अहवाल येईल आणि कॅबिनेटमध्ये या सर्व बाबी मांडण्यात येतील. त्यानंतरच मुख्यमंत्री आणि उपमुख्यमंत्री शेतकऱ्यांना मदतीचा निर्णय घेतील, अशी माहिती अब्दुल सत्तार यांनी दिली.