जालन्यातून धक्कादायक बातमी समोर आली आहे. राजुर–टेंभुर्णी रस्त्यावरील गाढेगव्हाण फाट्यावर आज सकाळी सहाच्या सुमारास भीषण अपघात झाला. रस्त्याच्या कडेला असलेल्या विहिरीमध्ये कार कोसळून ५ णांचा दुर्दैवी मृत्यू झाला. आजारी असलेल्या लेकीला उपचारासाठी घेऊन जाणाऱ्या आईसह भावांचा या अपघातामध्ये दुर्दैवी मृत्यू झाला.भोकरदन तालुक्यातील कोपरडा गावातून सुलतानपूरकडे भरधाव वेगात जाणारी ही कार रस्त्यालगत मॉर्निंग वॉकला जाणाऱ्या व्यक्तीला धडक देत विहिरीचे कठडे तोडून थेट विहिरीत कोसळली.

या अपघातामधील मृतांमध्ये दोन महिलांचा समावेश आहे. या अपघातात मृतांची ओळख पटली असून ज्ञानेश्वर डकले, पद्माबाई भांबीरे, निर्मलाबाई डकले, ज्ञानेश्वर भांबीरे आणि आदिनाथ भांबीरे यांचा समावेश आहे. छत्रपती संभाजीनगर जिल्ह्यातील रहिवासी असल्याची माहिती समोर आली आहे. दरम्यान घटनेची माहिती मिळताच टेंभुर्णी पोलिस आणि अग्निशामक दल घटनास्थळी दाखल झाले आहे. स्थानिकांच्या मदतीने विहिरीतील पाणी उपसून मृतदेह आणि कार बाहेर काढण्यात आली आहे.

आई आपल्या आजारी असलेल्या लेकीला उपचारासाठी बुलढाणा जिल्ह्यातील सुलतानपूर येथे घेऊन जात असताना जालन्यातील गाढेगव्हाण फाट्यावर विहिरीत कार कोसळून दुर्दैवी अपघात झाला. या अपघातामध्ये ५ जणांचा दुर्दैवी मृत्यू झाला. यामुळे डकले परिवार आणि भांबिरे परिवार या दोन्ही परिवारांवर दुःखाचा डोंगर कोसळला आहे. या अपघातात निर्मलाबाई डकले (आजारी लेक), पद्माबाई भांबीरे (आई), ज्ञानेश्वर डकले (दीर), ज्ञानेश्वर भांबीरे (भाऊ) आणि आदिनाथ भांबीरे (भाऊ) यांचा समावेश आहे.