जालना : जालना (Jalna) जिल्ह्यातील मोहाडी (Mohadi) येथील माजी सरपंचाची झोपेत असतानाच गोळ्या झाडून हत्या करण्यात आलीय. आज सकाळी ही घटना उघडकीस आली. छबु राठोड असं हत्या झालेल्या माजी सरपंचाचे नाव आहे. राठोड हे रात्री त्यांच्या घराच्या अंगणातच खाटेवर झोपलेले होते. नेमक्या याच गोष्टीचा फायदा त्यांच्या मारेकऱ्यांनी उठवला.

(Jalna Mohadi Murder Of Former Sarpanch)

हे देखील पहा :

रात्रीच त्यांची हत्या (Murder) करण्यात आली होती. आज सकाळी राठोड यांच्या घरातील मंडळींना त्यांचा मृतदेह रक्ताच्या थारोळ्यात आढळून आला. या घटनेची माहिती मिळताच पोलिसांनी घटनास्थळी धाव घेऊन पंचनामा केलाय. दरम्यान या खळबळजनक घटनेनंतर पोलिसांनी तातडीने पोलीस (Police) चौकशी सुरु करत तपासाला वेग दिला आणि राठोड यांच्या हत्येप्रकरणी 5 जणांवर गुन्हा दाखल केला आहे.

अजयसिंग राठोड, रामनाथ राठोड, विद्या राठोड, योगेश राठोड आणि आणखी एक अज्ञात आरोपी अशी संशयित आरोपींची नावं आहेत. हत्या झालेले छबु राठोड आणि आरोपींमध्ये याआधी देखील मारहाण होऊन एकमेकांना जीवे मारण्याच्या धमक्या दिल्या होत्या. शिवाय बऱ्याच वेळा वाद देखील झाले होते. अखेरीस पोलिसांनी 5 जणांविरोधात गुन्हा दाखल केला असून पोलीस या प्रकरणी अधिक तपास करत आहे.

Edited By : Krushnarav Sathe