अक्षय शिंदे, जालना

बँक अकाउंट, सोशल मीडिया अकाऊंट हॅक होणे यासारख्या घटना तुमच्या सोबतही होत असतीलच. तसेच वारंवार माहिती लीक होत असल्याच्या बातम्या देखील आपण ऐकतो. अशीच एक धक्कादायक घटना जालन्यातून समोर आली आहे. बनावट वेबसाईटद्वारे सरकारी डेटा चोरी होत आहे. याप्रकरणी जालना पोलिसांनी आतापर्यंत विविध देशातून पाच आरोपींना बेड्या ठोकल्या आहे.

काही दिवसांपूर्वी जालन्यात आरटीओ कार्यालयाच्या प्रक्रियेला बायपास करून 80 रुपयांत बनावट वेबसाईटद्वारे लर्निंग लायसन्स दिले जात असल्याचा प्रकार समोर आला होता. या प्रकरणी जालना सायबर पोलिस ठाण्यात गुन्हा दाखल झाला होता. त्यानंतर पोलिसांनी तपासाची चक्रे वेगाने फिरवत सखोल तपास केला. या तपासात पोलिसांसमोर धक्कादायक बाब उघडकीस आली.

या तपासात आधार कार्ड, पॅन कार्ड , राशन कार्ड,गॅस कार्डसह आरटीओ कार्यालयातील सरकारी डेटा चोरी होत असल्याचं पोलीस तपासात समोर आल आहे. जालना पोलिसांनी आतापर्यंत या प्रकरणात देशातील विविध भागातून पाच आरोपींना बेड्या ठोकल्या आहेत.

त्यामुळे हा राष्ट्रीय सुरक्षेचा प्रश्न आहे का? असा सवाल उपस्थित झाला आहे . दरम्यान या प्रकरणी पोलीस अधिक तपास करत असून अशा गुन्हेगारांवर आळा घालण्यासाठी पोलीस तत्परतेने कार्यरत आहेत.