Jalna Crime: जालना जिल्ह्यातील मंठा तालुक्यात भावी नवरदेवाने बोहल्यावर चढण्याआधीच वधूची गळा चिरून हत्या केल्याची धक्कादायक घटना घडली आहे. मंठा तालुक्यातील बेलोरा गावात ही घटना घडली. दीप्ती उर्फ कल्पना असे हत्या झालेल्या आठरा वर्षीय तरुणीचे नाव आहे.

मिळालेल्या माहितीनुसार, दीप्तीचा विवाह बुलढाणा जिल्ह्यातील मेहकर येथील तरुणासोबत ठरला होता. मार्चमध्ये 17 तारखेला विवाहचा मुहुर्त देखील ठरला होता. त्यामुळे दोन्हीकडचे मंडळी लग्नाचा बस्ता फाडण्यासाठी आज जालना शहरात आले होते. भावी नवरदेव देखील आपल्या परिवारासोबत जालन्यातत आला होता. (Latest Marathi News)

परंतु सगळे बस्ता बांधत असताना तो अचानक गायब झाला आणि त्याने थेट भावी वधूचे मंठा तालुक्यातील बेलोरा हे गाव गाठले. घरातील सगळेच लोक बस्ता बाधण्यासाठी जालन्याला गेलेले होते. त्यामुळे भावी वधू दीप्ती ही घरी एकटीच होती. यावेळी या तरुणाने तिची गळा चिरून हत्या केली. (Crime news)

या घटनेची माहिती गावकऱ्यांना मिळताच त्यांनी घटनास्थळी धाव घेतली. तोपर्यंत हा तरुण फरार झाला होता. गावकऱ्यांनी या घटनेची माहिती सेवली पोलिसांना दिली. त्यानंतर सेवली पोलीस स्टेशनच्या पोलीस कर्मचाऱ्यांसह विभागीय पोलिस अधिकारी घटनास्थळी दाखल झाले. सध्या पंचनामा करण्याची प्रक्रिया सुरू आहे. आरोपी तरूण सध्या फरार आहे. (Jalna News)

दरम्यान या घटनेचे कारण अद्याप अस्पष्ट आहे. गावातील लोकांनी या तरुणाच्या आई-वडिलांना एका घरात कोंडून ठेवलं असून यांनी मुलीची भरपाई द्यावी आणि हुंडा म्हणून घेतलेले चार लाख रुपये परत करावे अशी मागणी केली आहे. त्यांना पोलिसांच्या ताब्यात देण्यास गावकरी विरोध करत असल्याने गावात तणावाचे वातावरण निर्माण झाले आहे.