अक्षय शिंदे| जालना. ता. ३० जुलै २०२४

जालन्यामधून बस आणि कारचा भीषण अपघात झाल्याची घटना समोर आली आहे. कारने बसला धडक दिल्यानंतर हा अपघात झाला असून यामध्ये बसमधील १० जण जखमी झाले आहेत. अपघातातील जखमींवर सध्या रुग्णालयात उपचार सुरू असून जखमींपैकी काहींची प्रकृती गंभीर असल्याचे सांगण्यात येत आहे.

याबाबत सविस्तर माहिती अशी की, जालना शहराजवळ सिंदखेडराजा चौफुली येथे बस आणि कारचा भीषण अपघात झाला. कारने धडक दिल्यानंतर बस पलटी झाल्याने हा अपघात झाला. या अपघातामध्ये 10 जण जखमी झालेत.जखमींपैकी एकाची प्रकृती गंभीर आहे.

महाराष्ट्र परिवहन महामंडळाची ही बस हिंगोलीवरून पुण्याकडे निघाली होती. यावेळी सिंदखेडराजा चौफुलीजवळ पाठीमागून एका कारने जोरदार धडक दिली. ही धडक इतकी भीषण होती बस रस्त्यावर उलटली. यामध्ये बसमधील ६ प्रवासी आणि कारमधील ४ जण गंभीर जखमी झाले.

दरम्यान, अपघाताची माहिती मिळताच स्थानिकांसह पोलिसांनी घटनास्थळी धाव घेत जखमींना मदत केली. या अपघातामध्ये कारचा अक्षरशः चुराडा झाला आहे. तसेच उपचार सुरू असलेल्या कारमधील एकाची प्रकृती गंभीर असल्याचे सांगण्यात येत आहे.