महाराष्ट्राच्या दळणवळणाच्या सुविधेत क्रांतिकारक बदल घडवून आणणारी महत्त्वपूर्ण घोषणा केंद्रीय रस्ते वाहतूक आणि महामार्ग मंत्री नितीन गडकरी यांनी केली आहे. पुणे आणि छत्रपती संभाजीनगर या दोन शहरांना जोडणारा अत्याधुनिक, एक्स्प्रेस हायवे उभारण्यात येणार आहे. याबाबतची घोषणा नितीन गडकरी यांनी केली आहे. दरम्यान या प्रकल्पामुळे दोन्ही शहरांमधील प्रवासाचा वेळ मोठ्या प्रमाणात कमी होणार आहे. तसेच हा प्रस्तावित महामार्ग पूर्ण झाल्यानंतर जळगावहून पुण्याला जाण्यासाठी केवळ तीन तास लागतील.

म्हणजेच काय तर प्रवाशांचा निम्म वेळ वाचणार आहे. आता सध्या पुण्याहून छत्रपती संभाजीनगर येथे पोहोचण्यासाठी सहा ते साडेसहा तासांचा कालावधी लागतो. यामुळे प्रस्तावित उच्चगती महामार्ग पूर्णत्वास आला तर पुणे-छत्रपती संभाजीनगरमधील अंतर अवघ्या दोन तासांत पार करता येईल, असा दावा केंद्रीय मंत्री नितीन गडकरी यांनी केलाय. दुसरीकडे नागपूर ते मुंबई समृद्धी महामार्गाला जळगाव जोडण्याचा महत्वपूर्ण निर्णय मुख्यमंत्री देवेंद्र फडणवीस आणि केंद्रीय मंत्री गडकरी यांच्या उपस्थितीत घेण्यात आलाय.

जळगाव ते छत्रपती संभाजीनगर दरम्यानच्या महामार्गाला गती देताना जळगावहून मुंबई आणि पुण्याला कमी वेळेत कसे पोहोचता येईल, याबाबत चर्चा झालीय. सध्या अजिंठा, सिल्लोडमार्गे जळगावहून छत्रपती संभाजीनगरला पोहोचण्यासाठी अडीच तासाचा प्रवास करावा लागतो. हा रस्ता समृद्धी महामार्गाशी जोडण्यापूर्वी जळगाव ते छत्रपती संभाजीनगर दरम्यानचा प्रवास अवघ्या एक तासावर आणण्याचे ठरलंय.

जळगाव-छत्रपती संभाजीनगर दरम्यानचा प्रवासासाठी एक तास आणि पुढे छत्रपती संभाजीनगर ते पुणे उच्चगती महामार्गावरील प्रवासाचे २ तास गृहीत धरले तर अवघ्या तीन तासांत जळगावहून पुण्याला पोहोचणं शक्य होणार आहे.

पुणे-छत्रपती संभाजीनगर उच्चगती महामार्गासाठी १६ हजार ३१८ कोटी रुपये खर्च अपेक्षित आहे. हा महामार्ग अत्याधुनिक तंत्रज्ञानाच्या साहाय्याने उभारण्यात येणार आहे. यात उच्च दर्जाचे रस्ते, आधुनिक पूल, उड्डाणपूल, सेवा रस्ते तसेच सुरक्षिततेच्या दृष्टीने आवश्यक सर्व सुविधा उपलब्ध करण्यात येतील.