जळगाव : जिल्‍हा परिषद शाळा खासगी शाळांच्‍या तुलनेत मागे राहू नये; यासाठी प्रयत्‍न केले जात आहेत. आताच्‍या कोरोना प्रादुर्भावात शाळा बंद असल्‍या तरी जिल्‍हा परिषद शाळा कोणत्‍याही परिस्‍थीतीत मागे रहायला नको. याकरीता शाळांचे रूप पालटण्यासाठी जि.प.चे मुख्‍य कार्यकारी अधिकारी डॉ. पंकज आशिया यांनी १६ कलमी कार्यक्रम आखला आहे. (jalgaon-news-zilha-parishad-school-ceo-pankaj-aashiya-program-in-school-devolopment)

शालेय शिक्षण घेत असताना विद्यार्थ्यांना सर्व सुविधा तसेच शाळांचा विकास साधण्यासाठी मुख्य कार्यकारी अधिकारी डॉ. पंकज आशिया यांनी १६ कलमी कार्यक्रम हातात घेतला आहे. यात १६ विशिष्ट बाबींची शाळांकडून आठवड्याभरात माहिती मागविण्यात आली आहे. ही माहिती गोळा झाल्यानंतर यावर काम होणार आहे. त्यात पंधराव्या वित्त आयोगातून शाळांना विविध सुविधा पुरविल्या जाणार आहे.

शुक्रवारपर्यंत माहिती मागविली

सीईओ डॉ. आशिया यांनी आखलेल्‍या कार्यक्रमानुसार शाळांकडून येत्या शुक्रवारपर्यंत माहिती मागविण्यात आली आहे. यात शाळांचे रुप पालटण्यावर भर दिला जाणार आहे. विद्यार्थ्यांच्या सुरक्षेच्या दृष्टीने तसेच त्यांना उत्तम वातावरणात चांगले शिक्षण मिळावे यावर भर दिला जाणार असल्याचे शिक्षणाधिकारी भाऊसाहेब अकलाडे यांनी सांगितले.

अशा आहेत १६ बाबी

हॅण्डवॉश स्टेशन, रेन वॉटर हार्वेस्टींग, ग्रंथालय, किचन गार्डन, इंटरनेट, संगणक, लॅपटॉप, वर्ग खोल्या दुरूस्ती, विद्युतीकरण, वृक्षलागवड, बायोमॅट्रीक प्रणाली, सोलर लाईट, शैक्षणिक सॅाफ्टवेअर, शाळांना वॉल पेंटीग या बाबी कुठल्या शाळेत आहेत व कुठे नाहीत याची माहिती मागविण्यात आली आहे. यानुसार पुढील महिन्यांपासून यावर काम होणार आहे.