पाचोरा (जळगाव) : बोरखेडा (ता. चाळीसगाव) येथील रहिवासी व खडी मशिनवर कामास असलेल्या एका ३१ वर्षीय तरुणाने आपल्या सहा व चारवर्षीय चिमुकल्यांना धावत्या रेल्वेखाली झोकून देत स्वतः देखील आत्महत्या (Suicide) केली. रविवारी (ता. १३) सकाळी हा प्रकार घडला. याबाबत रेल्वे पोलिसांनी (Railway Police) अकस्मात मृत्यूची नोंद केली आहे. याबाबत उलटसुलट चर्चांना उधाण आले आहे. (jalgaon news Wife refuses to come Young man suicide by jumping in front of train with two child)

बोरखेडा येथील जितेंद्र दिलीप जाधव (वय ३१) हे खडी मशिनवर काम करतात. त्यांनी रविवारी सकाळी अकराच्या सुमारास नगरदेवळा रेल्वेस्थानकात (Railway) चिराग (वय ६) व खुशी (वय ४) या दोघा चिमुकल्यांना धावत्या सचखंड एक्स्प्रेसखाली ढकलून स्वतः देखील आत्महत्या केली. तिघांचे देह अक्षरशः छिन्नविछिन्न झाले होते. नगरदेवळा स्टेशनमास्तरांनी याबाबतची माहिती दिल्यानंतर रेल्वेचे चाळीसगाव येथील उपनिरीक्षक शेख, पाचोरा येथील रेल्वे हेडकॉन्स्टेबल भावसार व कॉन्स्टेबल वाघ यांनी तातडीने घटनास्थळी पंचनामा करून मृतदेह पाचोरा (Pachora) ग्रामीण रुग्णालयात आणले. शवविच्छेदनानंतर ते नातलगांच्या ताब्यात देण्यात आले.

पत्‍नीला घेण्यासाठी गेला होता

नगरदेवळा स्थानकात रेल्वे कि. मी. क्रमांक ३५३ अप रेल्वेमार्गावर ही घटना घडली. मृत जितेंद्र जाधव हे पत्नीला घेण्यासाठी गेले होते. परंतु, तिने येण्यास नकार दिल्याने, तसेच दोघांमध्ये काही वाद असल्याने जितेंद्र यांनी दोघा चिमुकल्यांसह आत्महत्येचे कठोर पाऊल उचलले असल्याची दबक्या आवाजात चर्चा आहे. त्यांच्या काही आप्तेष्टांनीही त्यास दुजोरा दिला आहे. पाचोरा रेल्वे पोलिस तपास करीत आहेत.