जामनेर|ता. २२ एप्रिल २०२४

जळगावच्या जामनेरमध्ये काल राष्ट्रवादी शरदचंद्र पवार पक्षाकडून कार्यकर्ता मेळावा घेण्यात आला. या कार्यक्रमात राष्ट्रवादीच्याच पदाधिकाऱ्यांमध्ये नाराजीनाट्य पाहायला मिळाले. राष्ट्रवादीच्या नेत्या रोहिणी खडसे यांना भाषण उरकरण्याची सुचना केल्याने त्यांनी जाहीरपणे नाराजी व्यक्त केली.

शरद पवारांसमोर नाराजीनाट्य!

याबाबत अधिक माहिती अशी की, शरद पवार (Sharad Pawar) यांच्या उपस्थितीत जामनेरमध्ये कार्यकर्ता मेळावा घेण्यात आला. या मेळाव्यात बोलताना रोहिणी खडसे यांना भाषण उरकण्याची सूचना मिळाल्याने रोहिणी खडसे (Rohini Khadse) यांनी भाषणातून आपली नाराजी व्यक्त केली.

काय म्हणाल्या रोहिणी खडसे?

"शरद पवारांनी आम्हाला समान हक्क दिलेला असून व्यासपीठावरील पुरुष बोलू शकतात तेवढा आमचाही अधिकार आहे. एका महिलेला पाच मिनिटे बोलायला सांगाल तर कसं चालेल अशा शब्दात रोहिणी खडसे यांनी शरद पवारांसमोर आपली नाराजी व्यक्त केली. तसेच आपण महायुतीच्या व्यासपीठावर नाही तर महाविकास आघाडीच्या व्यासपीठावर आहोत आणि तिथे महिलांना समसमान अधिकार आहेत," असेही रोहिणी खडसे म्हणाल्या.

आमच्या रक्तात गद्दारी नाही..

दरम्यान, यावेळी बोलताना रोहिणी खडसे यांनी एकनाथ खडसे (Eknath Khadse) यांच्या भाजप प्रवेशावरही महत्वाचे विधान केले. नाथाभाऊ कोणत्या परिस्थितीत भाजपमध्ये जात आहेत, हे सर्वांना माहित आहे. त्यामुळे मी त्यावर काही बोलणार नाही. आमच्या रक्तात गद्दारी नाही, असे त्या यावेळी म्हणाल्या.