जळगाव : राष्ट्रीय महामार्गावर दोन दिवसांपूर्वी झालेल्या अपघातात तरुणीसह महिलेचा मृत्यू झाल्याची घटना ताजी असतानाच पुन्हा एक भीषण अपघात झाला. भरधाव कारने एका ७८ वर्षीय वृद्धाला जबर धडक दिल्याने वृद्ध जागीच ठार झाला. या घटनेनंतर संतप्त नागरिकांनी महामार्गावर ठिय्या मांडत वाहतूक रोखली. 

जळगाव (Jalgaon) शहरातील द्वारकानगर परिसरातील रहिवासी अजबसिंग नारायण पाटील (वय ७८) असे अपघातात मृत झालेल्या वृद्धाचे नाव आहे. यावल येथील मूळ रहिवाशी असलेले अजबसिंग पाटील हे गेल्या अनेक वर्षांपासून मुलगी सुवर्णा मंगलसिंग पाटील यांच्याकडे राहत होते. दरम्यान अजबसिंग हे नेहमीप्रमाणे ३१ औगस्टला सकाळी अकराच्या सुमारास द्वारकानगर स्टॉपजवळ समवयस्क ज्येष्ठ नागरिकांसह गप्पा मारण्यासाठी गेले होते. यावेळी ते काही कामानिमित्ताने महामार्गाच्या पलीकडे जाऊ लागले. (Accident) रस्ता ओलांडत असताना, जळगावकडून एरंडोलकडे सुसाट जाणाऱ्या कारने त्यांना जबर धडक दिली. 

कारने जोरदार धडक दिल्याने अजबसिंग हे फेकले गेले. यात त्यांच्या हाताला व डोक्याला गंभीर दुखापत होऊन त्यांचा जागीच मृत्यू झाला. अपघातांनतर रहिवाशांनी धाव घेत त्यांना तत्काळ रुग्णालयात नेले. मात्र डॉक्टरांनी तपासणी करत त्यांना मृत घोषित केले. याबाबत तालुका पोलिस ठाण्यात आकस्मिक मृत्यूची नोंद झाली आहे. या घटनेनंतर परिसरातील नागरिकांनी धाव घेत महामार्गावर रास्तारोको आंदोलन केले. साधारण तीन तास चाललेल्या आंदोलनामुळे महामार्गावरील वाहतूक ठप्प झाली होती.