जळगाव : जळगावच नव्‍हे तर धुळे व नंदुरबार जिल्‍ह्यात यंदा पाऊस झालेला नाही. आतापर्यंत केवळ २५ ते ३० टक्‍केच पाऊस झालेला आहे. यामुळे शंभर टक्‍के पिकांचे नुकसान झाले आहे. याकरीता शेतकऱ्यांना सरसकट नुकसान भरपाई द्यावी तसेच खानदेशात दुष्‍काळ जाहीर करण्याची मागणी माजी मंत्री तथा आमदार गिरीश महाजन यांनी केली आहे. (jalgaon-news-bjp-leader-girish-mahajan-later-in-collector-Give-full-support-to-farmers-by-declaring-drought)

शेतकऱ्यांच्या मदतीसाठी आणि जिल्हा दुष्काळी जाहीर करण्यासाठी भाजपतर्फे आज जिल्हाधिकारी अभिजीत राऊत यांना निवेदन देण्यात आले. माजी मंत्री आमदार गिरिश महाजन, आमदार सुरेश भोळे यांच्या नेतृत्वाखाली सदर निवेदन दिले. याप्रसंगी आमदार संजय सावकारे, माजी आमदार स्मिता वाघ, महानगराध्यक्ष दीपक सूर्यवंशी आदी पदाधिकारी उपस्थित होते.

कृत्रिम पावसाचा प्रयोग करावा

जिल्‍ह्यात यंदा पाऊस झालेला नाही. यामुळे शेतकऱ्यांवर संकट ओढवले आहे. आता पाऊस आला नाही तर पुढे जावून पाण्याचा प्रश्‍न गंभीर होईल. यामुळे हे संकट टाळण्यासाठी राज्‍य सरकारने कृत्रिम पावसाचा प्रयोग करावा. कारण आता ढगाळ वातावरण असून त्‍याचा फायदा कृत्रिम पाऊस पाडण्यासाठी होईल; याकरीता लवकरात लवकर कृत्रिम पावसाचा प्रयोग करण्याची मागणी महाजन यांनी केली आहे.

झंवर सर्वच नेत्यांचे निकटवर्तीय : महाजन

बीएचआर प्रकरणात अटक करण्यात आलेले सुनील झंवर हे सर्वच नेत्यांचे निकटवर्तीय आहे. कुणी नाही म्हणून दाखवावे? असे स्‍पष्‍टीकरण आमदार गिरीश महाजन यांनी केले.