भुसावळ (जळगाव) : वीज वितरण प्रशासनातर्फे थकबाकी असलेल्या वीज बिलाची वसुली करण्यासाठी धडक मोहीम राबवली जात आहे. या मोहिमेअंतर्गत घरगुती तसेच व्यावसायिक व्यापाराचे बिल वसूल करण्यात येत आहे. या मोहिमेदरम्यान कर्मचाऱ्यास मारहाण केल्याची घटना शहरातील स्टेशन रोड परिसरात घडली. याप्रकरणी गुन्हा दाखल करण्यात आला आहे. या हल्ल्याचा निषेध म्हणून वीज वितरणतर्फे थकबाकीदारांचा वीज पुरवठा खंडित करण्यात आला आहे. जोपर्यंत आरोपींना अटक होत नाही तोपर्यंत वीजपुरवठा सुरू न करण्याची भूमिका कर्मचाऱ्यांनी घेतली आहे. (jalgaon-news-Bhusawal-power-worker-beaten-The-city's-electricity-was-cut-off)

शहरात महावितरण (Mahavitaran) प्रशासनातर्फे चार विभागात पथक तयार करून वीज बिल वसुली अभियान राबवण्यात येत आहे. या मोहिमेअंतर्गत शहरातील स्टेशन रोड परिसरात सातारा पूल विभागातील कर्मचारी सुधीर भारंबे आणि संदीप सोनवणे हे वीज बिलाच्या वसुलीसाठी गेले असता, एका व्यावसायिकाकडे घरगुती दोन बिल प्रत्येकी ३ हजार रुपये तर ६ हजार रुपये व्यावसायिक बिल अशी थकबाकी होती. कर्मचाऱ्यांनी या व्यवसायिकाचे बिल भरण्याची मागणी केली. भुसावळ (Bhusawal) शहरात एकूण 10 हजार ग्राहकांकडे साडेपाच कोटी रुपयांची वीज बिल (Electricity Bill) थकबाकी आहे.

गचंडी पकडून मारहाण

संबंधित व्यवसायकाने पैसे नसल्याचे सांगितले, तर कर्मचाऱ्यांनी घरगुती बिल नंतर भरा, अगोदर व्यवसायिक बिल भरण्याची सूचना केली. त्यामुळे संतापलेल्या व्यावसायिकाने कर्मचारी संदीप सोनवणे यांची गचंडी पकडली तर सुधीर तांबे यांच्या कानशिलात लगावली. त्यामुळे संतप्त कर्मचाऱ्यांनी बाजारपेठ पोलिस (Police) ठाणे गाठून तक्रार दिल्याने गुन्हा दाखल करण्यात आला आहे.