जळगाव : जळगाव जिल्ह्यातील पहूर- सोनाळा रस्त्यावर भरधाव कारने दुचाकीला समोरून जोरदार धडक दिली. यात एकाजणांचा जागीच मृत्यू झाला, तर अन्य तीनजण गंभीर जखमी झाले आहेत. जखमींना लागलीच रुग्णालयात उपचारासाठी दाखल करण्यात आले आहे. 

जामनेर (Jamner) तालुक्यातील पहूर- सोनाळा रस्त्यावर हा भीषण अपघात झाला. या अपघातात गजा बारेला (वय २५, रा. ठाठर कमला, ता.जि. बऱ्हाणपूर) या तरुणाचा मृत्यू झाला आहे. जामनेर तालुक्यातील सोनाळा येथील एका शेतकऱ्यांच्या शेतात गजा बारेला, त्याचा मोठा भाऊ अजय बारेला (वय ३०), लहान भाऊ राजू बारेला (वय २५), नातेवाईक दशरथ बहादूर बारेला (वय २०) हे सालदार म्हणून कामास होते. ते शेतातच वास्तव्यास होते. दरम्यान रविवारी पहूरचा बाजार असल्याने बाजारासाठी आले होते. बाजार झाल्यानंतर पहूर येथून दुपारी ते चौघे दुचाकीवर सोनाळा येथे परत निघाले होते. 

दरम्यान काही अंतरावर गेल्यानंतर कारने त्यांच्या दुचाकीला जबर धडक दिली. या (Accident) अपघातात दुचाकीचा चक्काचूर झाला. यामध्ये गजा बारेला याचा मृत्यू झाला आहे. तर जखमींना पहूर ग्रामीण रुग्णालयात नेले. तेथून जळगावच्या शासकीय वैद्यकीय महाविद्यालय व रुग्णालयात दाखल (Jalgaon Medical Collage) केले असून त्यांच्यावर शासकीय रुग्णालयात उपचार सुरू आहेत.