जळगाव : वेगवेगळ्या कारणांनी सायबर गुन्हेगारांकडून फसवणूक केल्याचे प्रकार समोर येत आहेत. असाच एक फसवणुकीचा प्रकार जळगावात समोर आला असून यात गुंतवणूक केल्यास त्या बदल्यात दुप्पट फायदा होईल; असे आमिष दाखवत तरुणींनी एका तरुणाची ५ लाख २० हजार रुपयात फसवणूक केल्याचे समोर आले. 

जळगाव (Jalgaon) तालुक्यातील शिरसोली येथील शुभम दिलीप लांबोळे (वय २७) असे फसवणूक झालेल्या तरुणाचे नाव आहे. शुभम लांबोळे याला काही दिवसांपूर्वी व्हॉटस्‌ॲप आणि टेलिग्रामवर दिव्या बस्सी नावाच्या तरुणीने संपर्क केला. या तरुणीने शुभम यास गुंतवणुकीत दुप्पट आर्थिक फायद्याचे आमिष देत शुभमला ऑनलाईन गुंतवणूक करण्यास सांगितले. तरुणीने सांगितल्यानुसार शुभम याने (Cyber Crime) गुंतवणुकीच्या दृष्टीने पैसे ट्रान्सफर केले. 

वेळोवेळी वेगवेगळ्या बँक खात्याद्वारे ५ लाख २० हजार रुपये मागवून फसवणूक केली. दरम्यान आपली फसवणूक झाल्याचे लक्षात आल्यानंतर शुभम लांबाळे याने दिलेल्या फिर्यादीवरून सायबर पोलिस (Cyber Police) ठाण्यात गुन्हा दाखल झाला आहे. पोलिस निरीक्षक दत्तात्रय निकम तपास करीत आहेत.