संजय महाजन, जळगाव

जळगाव शहरातील कानळादा रोड परिसरात एक धक्कादायक घटना समोर आली आहे. सततच्या कौटुंबिक वाद आणि पतीच्या दारूच्या व्यसनाला कंटाळून पत्नीनेच पतीचा गळा आवळून खून केल्याची घटना उघडकीस आली आहे. भरत नामदेव पाटील (वय ५०) असे मृत पतीचे नाव आहे. तर मनीषा भरत पाटील (वय ४५) असे आरोपी पत्नीचे नाव आहे. प्राथमिक चौकशीत आरोपीने गुन्ह्याची कबुली दिली असल्याची माहिती पोलिसांनी दिली. आरोपी पत्नीला पोलिसांनी अटक केली असून या प्रकरणामुळे परिसरात मोठी खळबळ उडाली आहे.

मिळालेल्या माहितीनुसार, भरत पाटील यांना दारूचे व्यसन होते. या व्यसनामुळे घरात वारंवार वाद होत होते. दारू पिऊन घरी आल्यानंतर ते पत्नीला त्रास देत असल्याचेही समोर आले आहे. गेल्या काही दिवसांपासून या कारणावरून दोघांमध्ये सतत भांडणे होत होती. अखेर या सततच्या मानसिक त्रासाला कंटाळून पत्नीने टोकाचे पाऊल उचलल्याचे समोर आले आहे.

घटनेच्या रात्री दोघांमध्ये पुन्हा वाद झाला. हा वाद विकोपाला गेल्यानंतर मनीषा पाटील यांनी पतीचा गळा आवळल्याचा आरोप आहे. या घटनेत भरत पाटील यांचा मृत्यू झाला. घटनेची माहिती मिळताच जळगाव शहर पोलिस घटनास्थळी दाखल झाले आणि त्यांनी पंचनामा करून मृतदेह शवविच्छेदनासाठी शासकीय रुग्णालयात पाठवला.

शवविच्छेदन अहवालात गळा आवळल्याने आणि श्वास गुदमरल्यामुळे मृत्यू झाल्याचे स्पष्ट झाले आहे. त्यानंतर पोलिसांनी अधिक चौकशी करत आरोपी पत्नीला अटक केली. या प्रकरणी जळगाव शहर पोलिस ठाण्यात खुनाचा गुन्हा दाखल करण्यात आला असून पोलिस पुढील तपास करत आहेत.