अमळनेर (जळगाव) : इंडियन प्रीमियर लीग अर्थात आयपीएलच्या सामने सध्या सुरु असून या सामन्यांवर मोठ्या प्रमाणात ऑनलाईन सट्टा खेळला जात आहे. अशाच प्रकरणे मोबाईलच्या माध्यमातून सट्टा खेळला जात असताना पोलिसांनी छापेमारी करत अमळनेरमध्ये कारवाई केली आहे. या कारवाईत पोलिसांनी दोघांना रंगेहात पकडत त्यांचे मोबाईल ताब्यात घेतले आहेत. 

आयपीएल टी ट्वेंटी क्रिकेट स्पर्धेतील साखळी सामने अंतिम टप्प्यावर आले असून आता रंगतदार मोडवर आहे. यात कोणता संघ जिंकेल, कोण किती रण करेल आणि कोण किती विकेट घेणार यावर जोरदार सट्टा चालविला जात आहे. काही सामने अखेरच्या बॉल पर्यंत जात असल्याने यावर सट्टा लावण्याचे प्रमाण अधिक आहे. असाच प्रकार जळगावच्या अमळनेर शहरात सुरु होता. याबाबत पोलिसांना माहिती मिळाली होती. 

दरम्यान अमळनेर शहरातील बालाजी पुरा भागात प्रसाद पांडुरंग साळी हा मोबाईलवर आयपीएल सामान्यांसाठी लोकांकडून पैसे स्वीकारून सट्टा खेळत आहे, अशी माहिती पोलिसांना मिळाली. या माहितीवरून पोलिस पथकाने सायंकाळी पावणेसातला पथकाने छापा टाकला. यावेळी प्रसाद साळी हा आयपीएल सामन्यावर सट्टा खेळताना आढळून आला. 

दोघेजण ताब्यात 

त्याला ताब्यात घेऊन विचारपूस केली असता आकाश महेंद्र पवार (रा. वडचौक, अमळनेर) याच्या सांगण्यावरून आयपीएल सामन्यावर सट्टा खेळवत असल्याचे सांगितले. त्यांच्याकडून पाच हजार रुपयांचा मोबाईल व ३१० रुपये रोख असा मुद्देमाल जप्त करण्यात आला. प्रसाद साळी व आकाश पवार यांच्याविरुद्ध मुंबई जुगार कायद्यानुसार गुन्हा दाखल करण्यात आला आहे. पोलिसांकडून आता कोणत्या सामन्यांवर किती रुपयांचा सट्टा खेळला? याचा शोध घेत आहेत.