अमराठी व्यापा-याला मारहाण केल्यामुळे मीरा-भाईंदरमधील राजकीय-सामाजिक वातावरण काही महिन्यांपूर्वी ढवळून निघालं होतं. आता महापालिका निवडणुकीच्या तोंडावर परप्रांतीयांची भूमिका काय असणार? याकडे सगळ्यांचं लक्ष असतानाच जैन मुनी निलेशचंद्रांनी सत्ताधारी भाजपवर जोरदार हल्लाबोल केलाय. तर शिंदे सेनेचं मात्र कौतुक केलंय. एका सत्संग कार्यक्रमात जैन बांधवांना काय आवाहन केलंय पाहा...

मारवाडी किंवा जैन बांधवांना हात लावला तर जशास तसे उत्तर मिळेल असा इशारा देतानाच त्यांनी मीरा-भाईंदरचे भाजपचे आमदार नरेंद्र मेहता आणि आमदार गीता जैन यांना बनावट वाघ-वाघीण म्हणत निशाणा साधलाय. मारवाडी किंवा जैन समाज शिवसेनेसोबत असल्याचा दावाही त्यांनी केलाय.

कबुतरखान्यासाठी आक्रमक भूमिका घेणाऱ्या जैन मुनींनी मराठी विरुद्ध मारवाडी या वादात उडी घेत यापूर्वी भाजपमंत्री मंगलप्रभात लोढा यांच्याविरुद्धही आक्रमक भूमिका घेतली होती. इतकच नाही तर त्यांनी कबुतरांच्या मुद्द्यावरुन शांतीदूत जनकल्याण पार्टीचीही घोषणा केलीय. अहिंसा हाच धर्म मानणारा जैन समाज आहे. मात्र जैन मुनींची भूमिका रोखठोक आहे. आक्रमक आहे. त्यांच्या आवाहनाला प्रतिसाद देत पालिका निवडणुकीत जैन समाज खरंच शिंदे सेनेकडे झुकणार का? की भाजपलाच पसंती देणार याकडे सगळ्यांच लक्ष आहे.