सुशील थोरात

Ahmednagar News : भाजपचा पराभव करण्यासाठी सर्वच विरोधी पक्ष प्रयत्न करत आहेत. त्यासाठी विरोधकांची एकजूट करण्याचे सर्वतोपरी प्रयत्न सुरु आहेत. एमआयएमचे खासदार इम्तियाज जलील यांनी देखील महाविकास आघाडीसोबत जाण्याचा प्रस्ताव ठेवला आहे.

जर महाविकास आघाडीच्या नेत्यांना वाटत असेल आम्ही ताकदवान आहोत, तर त्यांनी आमच्याकडे यावे. खासदर असदुद्दीन ओवेसी यांचे नेतृत्व स्वीकारावे. तर आम्ही त्यांच्या सोबत जाऊ, असं वक्तव्य संभाजीनगरचे एमआयएमचे खासदार इम्तियाज जलील यांनी अहमदनगर येथे बोलताना केले आहे. (Latest Marathi News)

भाजपला हरवण्यासाठी देशातील जे जे लोक प्रयत्न करत आहेत त्या लोकांसाठी आम्ही आमच्याकडून जी पाहिजे ती कुर्बानी देण्यासाठी तयार आहोत, असंही इम्तियाज जलील यांनी म्हटलं आहे.

संभाजीनगर येथील दंगल नियोजित

संभाजीनगर येथील दंगल ही नियोजित होती असा स्पष्ट आरोप त्यांनी केला असून या दंगलीच्या पाठीमागे राज्यातील सत्ताधाऱ्यांसह इतर पक्ष सामील आहे. ज्या दिवशी ही दंगल घडली त्यादिवशी संभाजीनगरमधील सर्व वरिष्ठ पोलीस अधिकारी कुठे होते आणि काय करत होते? याचे सीसीटीव्ही फुटेज तपासले तर सर्व काही सत्य समोर येईल.

आम्ही याबाबत देशाचे पंतप्रधान नरेंद्र मोदी यांना सविस्तर पत्र लिहून माहिती दिली आहे. मात्र पंतप्रधान कार्यालयाकडून आम्हाला फक्त दोन ओळीचे उत्तर मिळाले असून यावरूनच त्यांची मानसिकता समोर येते, असंही खासदार इम्तियाज जलील यांनी म्हटलं आहे.

कालीचरण महाराज भगव्या कपड्यातील गुंड

कालीचारण महाराजांसारखे भगव्या कपड्यातील गुंड असून त्यांची जागा जेलमध्ये आहे. आम्हाला बोलायची परवानगी द्या मग पाहू कोण जिंकतय. या लोकांना भगव्या कपड्याच्या आडून राज्यात देशात धार्मिक तेढ निर्माण करायची आहे, असंही इम्तियाज जलील यांनी म्हटलं आहे.