महाराष्ट्रात ‘ऑक्टोबर हीट’ कायम आहे. ढगाळ हवामानामुळे पावसाला पोषक हवामान होत आहे. आज राज्यात काही ठिकाणी विजांसह पावसाची शक्यता असल्याने हवामान खात्याने येलो अलर्ट दिला आहे. कोकण, मध्य महाराष्ट्र आणि मराठवाड्यात पावसाच्या उघडिपीसह उन्हाचा चटका कायम राहण्याची शक्यता हवामान विभागाने वर्तविली आहे.

महाराष्ट्रात काही प्रमाणात उन्हाची तीव्रता आणि उकाडा कायम असल्याने दुपारच्या वेळी घराबाहेर पडणे नागरिकांना तापदायक ठरत आहे. तसेच किमान तापमानात घट होऊ लागल्याने पहाटेच्या सुमारास गारवा वाढू लागला आहे. काल सकाळपर्यंतच्या २४ तासांत सांताक्रूझ येथे ३५.८ अंश सेल्सिअस, ‎डहाणू, ‎ब्रह्मपुरी येथे ३५ अंशांपेक्षा अधिक, तर सोलापूर, ‎रत्नागिरी, अमरावती, ‎‎अकोला, जळगाव, ‎चंद्रपूर येथे ३४ अंशांपेक्षा अधिक तापमानाची नोंद झाली.

आज (ता. २१) सिंधुदुर्ग, सातारा घाटमाथा, कोल्हापूर, परभणी, हिंगोली, नांदेड, बुलडाणा, अकोला, अमरावती, गोंदिया, गडचिरोली या जिल्ह्यात विजांसह पावसाची शक्यता असल्याने दक्षतेचा इशारा (येलो अलर्ट) आहे. कोकण, मध्य महाराष्ट्र, मराठवाड्यात तुरळक ठिकाणी विजांसह पावसाची शक्यता आहे.

उर्वरित राज्यात ढगाळ आकाशासह, मुख्यतः कोरडे हवामान, आणि उन्हाचा चटका कायम राहण्याचा अंदाज हवामान विभागाने वर्तविला आहे. दरम्यान पावसाच्या उगडीपीमुळे आणि उकडाच्या काहिलीमुळे नागरिक त्रस्त झाले आहेत. अशा बदलत्या वातावरणामुळे सर्दी खोकल्यासारखे आजार जोर धरू लागले आहेत.