राज्यातुन मान्सून माघारी जात आहे. अशातच कोकणात पावसाने हजेरी लावली आहे. हवामान खात्याने दर्शवलेल्या अंदाजानुसार आज कोकणाला यलो अलर्ट देण्यात आला होता. तर काही ठिकाणी उन्हाची काहिली भलतीचं ताप देत आहे. त्यातच रत्नागिरीसह कोकणात पावसाची बॅटिंग सुरु झाली आहे.

बंगालच्या उपसागरात चक्राकार वारे त्यामुळे पुढील दोन दिवस कोकणात पावसाचा अंदाज वर्तवण्यात आला आहे. रत्नागिरी - जिल्ह्यातील अनेक भागात आज दुपारनंतर विजांच्या कडकडाटासह पावसाची सुरुवात झाली आहे. रत्नागिरी जिल्ह्यातील देवरुख, संगमेश्वर, लांजा, राजापूर भागात दमदार पाऊस सुरु झाला आहे.

हवामान खात्याने दर्शवलेल्या अंदाजानुसार, आज रत्नागिरी, सिंधूदुर्ग मध्य महाराष्ट्रातील अहिल्यानगर, पुणे, कोल्हापूर, सातारा, सांगली, छत्रपती संभाजीनगर, जालना, परभाणी, बीड, हिंगोली, नांदेड, लातूर, धाराशिव जिल्ह्यात काही ठिकाणी विजांसह पावसाचा अंदाज आहे. तर ठाणे, रायगड, जळगाव, नाशिक जिल्ह्यात तुरळक ठिकाणी पावसाच्या हलक्या सरीचा अंदाज आहे. तर उर्वरित राज्यात मात्र कोरडे हवामानासह उन्हाचा चटका कायम राहण्याची शक्यता आहे.

उद्या म्हणजेच गुरुवारी कोकणातील सिंधूदुर्ग, रायगड, मध्य महाराष्ट्रातील धुळे, जळगाव, नाशिक, अहिल्यानगर, पुणे, सातारा मराठवाड्यातील छत्रपती संभाजीनगर, जालना, बीड, लातूर, धाराशिव जिल्ह्यात काही ठिकाणी विजांसह पावसाचा अंदाज आहे. तर नांदेड, हिंगोली, परभणी, सोलापूर, सांगली, कोल्हापूर, नंदुरबार, सिंधुदुर्ग, मुंबई, ठाणे आणि पालघर जिल्ह्यात तुरळक ठिकाणी पावसाची शक्यता आहे.