अभिजीत घोरमारे

Gondia Crime News : गोंदिया येथून काळीज सुन्न करणारी एक घटना समोर आली आहे. बायकोसोबत झालेल्या भांडणाचा राग मनात ठेवून जावयाने पत्नीसह मुलाला आणि सासऱ्याला पेट्रोल टाकून जाळल्याची धक्कादायक घटना घडली आहे. या घटनेमध्ये सासऱ्याचा जळून मृत्यू झाला आहे, तर पत्नी व मुलगा 90 टक्के भाजले आहेत. (Latest Gondia Crime News)

मिळालेल्या माहितीनुसार, घटना गोंदिया जिल्ह्याच्या सुर्याटोला येथे रात्रीच्या सुमारास घडली. गोंदिया शहरातील सुर्याटोला येथील देवानंद मेश्राम (वय 52 वर्ष) त्यांची मुलगी आरती किशोर शेंडे (वय 35 वर्ष), नातू जय किशोर शेंडे (वय 4वर्ष) हे तिघे रात्री झोपले असता आरोपी जावाई किशोर शेंडे (वय 41 वर्ष रा. भिवापूर तिरोडा)याने तिघांची निर्घृण हत्या केली आहे.

किशोर शेंडे रात्री गोंदिया येथे त्याच्या सासरी आला होता. तो घरी आला आहे हे त्यावेळी कुणाला समजले नाही, कारण रात्री सर्वजण झोपेत होते. यावेळी पत्नीचा राग डोक्यात असल्याने त्याने पत्नी, मुलगा आणि सासऱ्याला जीवंत जाळले. पेट्रोल टाकून जाळल्याची घटना रात्री 12 ते 1 च्या सुमारास घडली आहे.

यात देवानंद मेश्राम यांचा जळून मृत्यू झाला. तर आरती व जय हे 90 टक्के जळाले असून त्यांना नागपुर येथे उपचारासाठी पाठवण्यात आलं आहे. आरोपी जावई फरार असून पोलिस त्याचा शोध घेत आहेत. या धक्कादायक घटनेमुळे गावात एकच खळबळ उडाली असून शोककळा पसरली आहे.