स्थानिक स्वराज्य संस्थांच्या निवडणुकांची रणधुमाळी सुरू आहे. राज्यातील काही भागांमध्ये सकाळपासूनच जोमाने मतदान प्रक्रिया पार पडत आहे. हिंगोलीतील कळमनुरी येथेही मतदान प्रक्रिया पार पडत आहे. अशातच कळमनुरी विधानसभा मतदारसंघात शिवसेना शिंदेसेनेच्या आमदारांनीच मतदानाच्या गोपनीयतेचा भंग केला आहे. याचा व्हिडिओही समाजमाध्यमांमध्ये व्हायरल होत आहे.

कळमनुरी विधानसभा मतदारसंघात मतदान प्रक्रियेला वेग आला. जनतेनं सकाळपासूनच मतदान करण्यासाठी आपआपल्या बूथवर रांगा लावण्यास सुरूवात केली आहे. दरम्यान, शिवसनेचे कळमनुरी विधानसभा मतदारसंघाचे आमदार संतोष बांगर यांनी सकाळीच आपल्या मतदानाचा अधिकार बजावला आहे. त्यांनी व्होटिंग बूथवर जाऊन मतदान केलं आहे.

हिंगोली शहरातील मंगळवारी बाजार परिसरात जाऊन शिंदेसेनेचे आमदार संतोष बांगर यांनी हा मतदानाचा अधिकार बजावला आहे. मात्र, मतदान करताना संतोष बांगर यांनी नियमांचे उल्लंघन केलं आहे. त्यांनी व्होटिंग बूथवर गोपनीयतेचा भंग केला आहे. संतोष बांगर यांनी मतदान केल्यानंतर केंद्रात घोषणाबाजी केली आहे.

बटन दाबताना महिलेला बांगर यांनी सूचना दिल्या. तसेच त्यांनी मतदान करताना घोषणाबाजीही केली. 'स्वर्गीय बाळासाहेब ठाकरेंचा विजय असो. एकनाथ शिंदे आगे बढो हम तुम्हारे साथ है', असं म्हणत बांगर यांनी घोषणाबाजी केली. दरम्यान बांगर यांनी गोपनीयतेचा भंग केल्यामुळे निवडणूक आयोग आता त्यांच्यावर काय कारवाई करणार? हे पाहणं आता महत्वाचं ठरेल.