- बालाजी सुरवसे

तुळजाभवानी देवीच्या सोने-चांदी अपहार प्रकरणातील दोषींवर तात्काळ फौजदारी गुन्हे दाखल करा अन्यथा उच्च न्यायालयाच्या निर्णयाचा अवमान केला म्हणून अवमान याचिका दाखल करावी लागेल अशी भूमिका आज (शुक्रवार) हिंदु जनजागृती समीतीने पत्रकार परिषदेतून मांडली. दरम्यान वेळ प्रसंगी मंत्रालयासमोर आम्हांला उपोषणाला बसावे लागले तर आम्ही ते देखील करु असेही समितीने स्पष्ट केले. (Maharashtra News)

हिंदू जनजागृती समीतीचे महाराष्ट्र आणि छत्तीसगड राज्य समन्वयक सुनिल घनवट म्हणाले महाराष्ट्राची कुलस्वामिनी आई तुळजाभवानी मातेच्या मंदिरातील सन 1991 ते 2009 या कालावधीतील सोने चांदी अपहार प्रकरणी दोषींवर तात्काळ फौजदारी गुन्हे दाखल करण्याचे उच्च न्यायालयाच्या छञपती संभाजीनगर खंडपीठाने आदेश दिले आहेत.

हे आदेश 10 दिवसांपूर्वीच दिलेत. तरीही अद्याप गुन्हे दाखल करण्यात आलेले नाहीत. यामध्ये जवळपास 8 कोटी 45 लाख 97 हजार रुपयांचा भ्रष्टाचार झाला आहे. यामध्ये 16 जणांचा समावेश आहे.

घनवट पुढं बाेलताना म्हणाले यामध्ये 9 लिलावदार, 6 तहसीलदार, 1 व्यवस्थापक, धार्मिक अधिकारी आहेत. या दोषी ठरवण्यात आले आहे. त्यामुळे प्रशासनाने तात्काळ गुन्हे दाखल करावे अन्यथा उच्च न्यायालयाच्या निर्णयाचा अवमान केला म्हणून अवमान याचिका दाखल करावी लागेल.

('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

दरम्यान वेळ प्रसंगी मंत्रालयासमोर आम्हांला उपोषणाला बसावे लागले तर आम्ही ते देखील करु. तसेच तपासणी दरम्यान जे दोषी आढळतील त्या सर्वांची वैयक्तिक संपत्ती जप्त करुन संबधित झालेल्या भ्रष्टाचार वसुली करावी अशी मागणी हिंदू जनजागृती समितीने केली आहे.

Edited By : Siddharth Latkar