बर्फाच्छादित डोंगर, हॉटेलच्या खिडकीतून बाहेर पाहणारे उत्साही पर्यटक आणि बर्फात खेळणारी मुले. हे दृश्य स्नप्नाहून कमी नाहीये. काश्मीर खोऱ्याने पांढरी चादर पांघरली आहे! गुलमर्ग, पहलगाम आणि सोनमर्ग यांसारख्या प्रसिद्ध पर्यटन स्थळांवर जोरदार हिमवृष्टी झालीय, सर्वत्र बर्फाची चादर पसरलीय. पर्यटनासाठीच्या या "गोल्डन डेज" मध्ये हॉटेल व्यावसायिक आणि स्थानिकही सुखावले आहेत.

जम्मू-काश्मीरसह हिमाचल प्रदेशात शुक्रवारी बर्फवृष्टी झालीय. गुलमर्गमध्ये दोन फुटांपेक्षा जास्त तर सोनमर्गमध्ये सहा इंच बर्फ साचला. खोऱ्यातील बडगाम, बारामुल्ला, कुपवाडा, शोपियां, पुलवामा आणि बांदीपुरा जिल्ह्यांमध्ये मध्यम ते जोरदार तर अनंतनाग आणि कुलगाम जिल्ह्यांमध्ये हलकी बर्फवृष्टी झाली. श्रीनगरमध्ये या हंगामातील पहिली बर्फवृष्टी झाली.

श्रीनगरने तर जणू चांदीचा मुकुट परिधान केला आहे. जिथे दोन फुटांच्या बर्फाखाली धरणी विसावली आहे. बडगाम, बारामुल्ला आणि कुपवाड्याच्या डोंगरदऱ्यात निसर्गाचा रुपेरी अभिषेक सुरू असतानाच, श्रीनगरनेही या हंगामातील पहिल्या हिमस्पर्शाचा आनंद लुटला. अनंतनागपासून कुलगामपर्यंत सर्वत्र पसरलेले हे स्वर्गीय अनुपम सौंदर्य पर्यटकांच्या डोळ्यांचे पारणे फेडतंय...

मात्र बर्फवृष्टीमुळे वाहतूक आणि दैनंदिन जीवनावर परिणाम झालाय. खराब हवामानामुळे श्रीनगर विमानतळावरून २०पेक्षा जास्त विमानांचे उड्डाण रद्द करण्यात आलेत. जम्मू-श्रीनगर महामार्गासह अनेक मार्ग बंद करण्यात आले, श्रीनगरची विमानसेवा विस्कळीत झाली, उचांवरील प्रदेशांमध्ये शाळा बंद ठेवल्यात. तर तिकडे कटारा येथील त्रिकुटा डोंगरांवर या हंगामात पहिल्यांदाच बर्फ पडल्यामुळे वैष्णोदेवी यात्रा स्थगित करण्याचा निर्णय घेण्यात आलाय. निसर्ग पर्यटकांवर खुश असला तरी यामुळे नागरिकांना अनेक समस्यांचा सामनाही करावा लागत आहे.