धुळ्यामध्ये उपसरपंच आणि गावकऱ्यांमध्ये फ्री-स्टाईल हाणामारी झाल्याची घटना समोर आली आहे. धुळ्याच्या शिंदखेडामध्ये ही घटना घडली. या घटनेचा व्हिडीओ समोर आला असून तो सोशल मीडियावर व्हायरल होत आहे. गटारीच्या खोदकामावरून हा वाद झाला. सुरूवातीला शाब्दीक वाद झाला. त्यानंतर उपसरपंच आणि गावकऱ्यांनी एकमेकांची कॉलर पकडून धू धू धुतलं. या घनेचा व्हिडीओ समोर आला असून तो सोशल मीडियावर व्हायरल होत आहे.

मिळालेल्या माहितीनुसार, शिंदखेडा तालुक्यातील कलमाडी ग्रामपंचायत अंतर्गत करण्यात येणार्‍या गटारीच्या कामावरून उपसरपंच आणि गावकऱ्यांमध्ये वाद झाला. उपसरपंच आणि गावकऱ्यांमधील वाद इतका उफाळला की या वादाचे रूपांतर हाणामारीत झाल्याचे दिसून आले. यावेळी ग्रामपंचायत उपसरपंच जाणीवपूर्वक खासगी मालकीच्या जागेतून अतिक्रमण असल्याचे म्हणत गटारीसाठी खोदकाम करत असल्याचा आरोप संबंधित ग्रामस्थांनी लावला आहे.

गटारीच्या कामाचा वाद इतका वाढला की भररस्त्यात उपसरपंच आणि गावकऱ्यांनी एकमेकांना मारहाण केली. या फ्री-स्टाईल हाणामारीचा व्हिडीओ समोर आला आहे. या हाणामारीत महिला देखील दिसत आहेत. आता हे प्रकरण नरडाणा पोलिस ठाण्यात पोहचले. या प्रकरणाचा तपास नरडाणा पोलिस अधिकारी करत आहेत. त्यानंतर याबाबत गुन्हा दाखल करण्याचे काम करण्यात येणार असल्याचे संबंधित अधिकाऱ्यांतर्फे स्पष्ट करण्यात आले आहे.