मुंबई : छत्रपती शिवाजी महाराजांबद्दल  (Chhatrapati Shivaji Maharaj) चुकीचं वक्तव्य केल्यामुळे भाजपचे आमदार प्रसाद लाड यांच्यावर चौफेर टीका होत आहे. भाजपचा सत्तेतील सहकाही पक्ष बाळासाहेबांची शिवसेना पक्षाचे आमदार, मंत्री गुलाबराव पाटील यांनी प्रसाद लाड यांना सज्जड दम भरत इशारा दिला आहे.

मंत्रिपद गेलं खड्ड्यात, कुणालाही सोडणार नाही, असं म्हणत गुलाबराव पाटील यांनी शिवरायांविषयी वादग्रस्त वक्तव्य करणाऱ्यांना खडेबोल सुनावले. (Latest News Update)

छत्रपती शिवरायांच्या बाबतीत कोणाही मायच्या लालला बोलण्याचा अधिकार नाही. मग तो कुणीही असो. राज्यपाल असो की कुणीही. छत्रपती शिवाजी महाराज हे देवांचे देव आहेत. त्यांच्यापेक्षा कुणीही मोठं नाही, असं गुलाबराव पाटील यांनी म्हटलं.

कोणीही उठते आणि छत्रपती शिवाजी महाराज यांच्याविषयी बोलत आहे. आता इथून पुढे कुणी शिवरायांचा अवमान केला तर मी सोडणार नाही. महाराजांबद्दल चुकीचं बोलणारा तो कुणीही असो वा कुठल्याही पक्षाचा असो, चुकीला माफी नाही, असा इशारा मंत्री गुलाबराव पाटील यांनी दिला.

शिवरायांविषयी कोणीही काहीही बोलतंय मात्र हे खपवून घेणार नाही. तो कोणत्याही पक्षाचा असेल त्याला माफ केले जाणार नाही. शिवाजी महाराज हे देवांचे देव आहेत. ज्यांनी चरित्र वाचलंय त्यांनीच बोलावं शिवरायांवर बोलण्यासाठी आचारसंहिता करण्याची गरज आहे. महाराजांच्या नखाची सरही यांना नाही. त्यामुळे मंत्रिपद गेलं खड्ड्यात, कुणालाही सोडणार नाही, असं गुलाबराव पाटील म्हणाले.