Summary -

• महिला व बाल विकास विभागात ८,६६९ पदांची भरती

• २३ वर्षांनंतर मोठा निर्णय घेण्यात आला

• अंगणवाडी सेविका आणि मदतनीस पदांना मंजुरी

• राज्यातील तरुणांसाठी मोठी नोकरीची संधी

नोकरीच्या प्रतीक्षेत असलेल्या राज्यातील तरुणांना सरकारी नोकरी मिळवण्याची सुवर्णसंधी आहे. लवकरच महिला व बाल विकास विभागात मोठी भरती होणार आहे. तब्बल २३ वर्षांनंतर महिला व बाल विकास विभागामध्ये ८ हजार ६६९ नियमित पदे भरण्यात येणार आहेत. त्याचसोबत, बाह्ययंत्रणेद्वारे २ हजार ८४३ पदे आणि अंगणवाडी सेविका व मदतनीसांच्या २ लाख २१ हजार ३२८ पदांना मंजुरी देण्यात आली आहे. महिला व बाल विकास विभागाने हा मोठा निर्णय घेतला असल्याची माहिती मंत्री आदिती तटकरे यांनी दिली.

महिला व बाल विकास विभागामध्ये तब्बल २३ वर्षांनंतर ८ हजार ६६९ नियमित पदे भरण्यात येणार आहेत. मंत्री आदिती तटकरे यांनी सांगितले की, या निर्णयामुळे विभागाच्या सक्षमीकरणाला मोठी चालना मिळणार आहे. महिला व बाल विकास विभागातील एकूण पदांचा आढावा घेण्यात आला. त्यापैकी काही पदे रद्द करून १६५ नव्या पदांची वाढ करण्यात आली आहे. त्यामुळे विभागासाठी एकूण ८ हजार ६६९ नियमित पदे मंजूर करण्यात आली आहेत.

महिला व बाल विकास विभागाच्या कामकाजासाठी २ हजार ८४३ पदे बाह्ययंत्रणेमार्फत भरण्यास मान्यता देण्यात आली आहे. एकात्मिक बाल विकास सेवा (ICDS) योजनेअंतर्गत १ लाख १० हजार ६६४ अंगणवाडी सेविका व १,१०,६६४ अंगणवाडी मदतनीस अशी एकूण २ लाख २१ हजार ३२८ मानधनाधारित पदे देखील मंजूर करण्यात आली आहेत.

मंत्री आदिती तटकरेंनी सांगितले, २३ वर्षांनंतर घेतलेला हा महत्त्वपूर्ण निर्णय विभागाच्या सक्षमीकरणासाठी अत्यंत उपयुक्त ठरणार आहे. यामुळे महिला व बालकल्याण योजनांची अंमलबजावणी अधिक प्रभावीपणे होईल.'दरम्यायन, महिला व बाल विकास विभागामध्ये या सर्व पदांसाठी लवकरच भरती होणार आहे. या भरतीअंतर्गत नोकरी मिळवण्याची राज्यातील अनेक तरुण-तरुणींना चांगली संधी असणार आहे.