औरंगाबाद - छत्रपती शिवाजी महाराज तो पुराने जमाने की बात है अभी तुम्हारे सामने गडकरी जैसे आदर्श है असे वक्तव्य राज्यपाल डॉ. भगत सिंग कोश्यारी (Bhagat Singh Koshyari) यांनी केलेलं आहे. डॉ. बाबासाहेब आंबेडकर विद्यापीठाच्या ६२व्या दीक्षांत समारंभामध्ये ते बोलत होते.

या कार्यक्रमामध्ये राष्ट्रवादीचे काँग्रेसचे नेते शरद पवार आणि केंद्रीय मंत्री नितीन गडकरी यांना डी. लिट पदवीने सन्मानित करण्यात आलं. पवार आणि गडकरी हे दोघेही व्हिजनरी आहेत. पीएचडी आणि डी. लिट पेक्षाही या नेत्याचं काम मोठं आहे अशा शब्दात राज्यपालांनी या दोघांच्या कार्याचा गौरव केला. (Latest Marathi News)

महाराष्ट्राचं श्रद्धास्थान असलेल्या छत्रपती शिवाजी महाराज यांच्याबद्दल वादग्रस्त विधान करण्याची राज्यपाल भगत सिंह कोश्यारी यांची ही काही पहिलीच वेळ नाही. याआधीही त्यांनी औरंगाबादमध्ये छत्रपती शिवाजी महाराजांबद्दल एक विधान केलं होतं. त्यात त्यांनी समर्थ रामदासांविना छत्रपती शिवाजी महाराजांना कोणी विचारलं असतं, असं म्हटलं होत. त्यावेळी देखील वाद उफाळला होता.

महात्मा फुले आणि सावित्रीबाई फुले यांच्याबद्दल वादग्रस्त वक्तव्य

भगतसिंह कोश्यारी यांनी सावित्रीबाई फुले यांच्याबाबतही केलेल्या वक्तव्यामुळेही वाद निर्माण झाला होता. त्यावेळी त्यांनी म्हटलं होतं की, सावित्री बाईंचं लग्न दहाव्या वर्षी झालं, तेव्हा त्यांच्या पतीचं वय हे 13 वर्ष होतं. कल्पना करा ही लहान मुलगा मुलगी लग्नानंतर काय करत असतील? लग्न झाल्यानंतर काय विचार करत असतील?