गणेशोत्सव हा कोकणातील लोकांसाठी केवळ धार्मिक सण आपुलकीचे क्षण आणि परंपरेला दिलेला नवा आयाम असतो. दरवर्षी या सणासाठी मुंबई, पुण्यासह राज्यातील विविध भागातून लाखो गणेशभक्त कोकणाकडे धाव घेतात. अशा वेळी प्रवाशांच्या सुरक्षित, सुकर आणि वेळेवर प्रवासाची जबाबदारी पेलणारे महाराष्ट्र राज्य मार्ग परिवहन महामंडळ (एमएसआरटीसी) यावर्षीही मोठ्या तयारीनिशी सज्ज झाले होते. त्याचा थेट फायदा रत्नागिरी विभागाला झाला असून या वर्षी विभागाने तब्बल पाच कोटी २३ लाख ६३ हजार ९३५ रुपयांचे विक्रमी उत्पन्न मिळवले आहे.

गेल्या वर्षी गणेशोत्सव काळात रत्नागिरी विभागाच्या उत्पन्नाचा आकडा साडेतीन कोटी रुपयांवर थांबला होता. यंदा मात्र तब्बल दोन कोटी ६३ लाख रुपयांची लक्षणीय वाढ झाली असून ही वाढ एस.टी.च्या नियोजनक्षमतेचा आणि प्रवाशांच्या विश्वासाचा पुरावा मानली जात आहे. मुंबईतून मोठ्या संख्येने कोकणात येणाऱ्या भाविकांच्या परतीच्या प्रवासासाठी एस.टी. महामंडळाने यावर्षी विक्रमी २,६९० जादा गाड्या सोडल्या. केवळ मुंबईच नव्हे, तर कोकणातील जिल्ह्यांतर्गत प्रवाशांची वाढती गर्दी लक्षात घेऊन ६१७ जादा गाड्यांची व्यवस्था करण्यात आली. अशा प्रकारे एकूण ३ हजार ३०७ गाड्या उत्सव काळात रत्नागिरी जिल्ह्यातून धावल्या.

कोकणात गणेशोत्सव साजरा करण्यासाठी मोठ्या प्रमाणावर कोकणवासीय कोकणच्या दिशेने रवाना होतात. तिकीट बुकिंगपासून ते वस्तूंची खरेदीची लगबग यासाठी महिनाभर आधीपासून त्यांची तयारी सुरु होते. मात्र रेल्वे बुकिंग सुरु झाल्यापासून अगदी क्षणातच रेलवेच्या तिकीट संपतात. अशा कारणांमुळे कोकणवासीयांना रेल्वेच्या दारात बसून प्रवास करावा लागतो. मात्र प्रवाशांचा त्रास कमी व्हावा यासाठी स्थानिक आमदारांकडून अनेक मोफत एसटी सेवा पुरवल्या गेल्या.

रत्नागिरी विभागाने मिळवलेले हे उत्पन्न केवळ आर्थिक दृष्ट्या महत्त्वाचे आहे. राज्यातील इतर कोकण विभागांमध्येही यावर्षी उत्पन्नवाढ झाल्याचे दिसून आले आहे. प्रवाशांकडून मिळालेला हा प्रतिसाद पाहता पुढील वर्षांमध्ये आणखी जादा गाड्या सोडण्यात येण्याची शक्यता आहे.