गडचिरोली जिल्ह्यामध्ये पावसाने कहर केला आहे. कालपासून पडणाऱ्या मुसळधार पावसामुळे गडचिरोलीतील पर्लकोटा नदीला पूर आला आहे. या पुरामुळे तालुक्यातील अनेक गावांचा संपर्क तुटला आहे. पुराचे पाणी अनेक गावांमध्ये शिरले आहे त्यामुळे भामरागडमधील घरं- दुकानं आणि शेती पाण्याखाली गेली आहे. या पुरामुळे गडचिरोलीतील जनजीवन विस्कळीत झाले आहे.

मिळालेल्या माहितीनुसार, गडचिरोली जिल्ह्यातील अनेक भागात रविवारी सायंकाळपासून जोरदार पाऊस पडत आहे. पावसामुळे भामरागड लगतच्या पर्लकोटा नदीला पूर आला आहे. पुराचे पाणी शहरात शिरले असून येथील शंभरहून अधिक घरं, दुकानं पाण्याखाली गेली आहेत. त्यामुळे संसार उपयोगी साहित्य आणि दुकानांमधील सामानांची मोठी नासधूस झाली आहे. या पुरामुळे व्यावसायिकांचे मोठे नुकसान झाले आहे.

मुसळधार पावसामुळे पर्लकोटा नदीला आलेल्या पूराचे पाणी आज सकाळी शहरामध्ये शिरले त्यामुळे नागरिकांची एकच तारांबळ उडाली. या पुरामुळे भामरागड तालुक्यातील १२० गावांचा संपर्क तुटला आहे. पुराच्या पाण्याने अनेक गावांना वेढा घातला आहे. या पुरामुळे नागरिकांना सुरक्षित स्थळी हलवण्यात आले आहे. पुराची स्थिती लक्षात घेता नागरिकांना सतर्क राहण्याचे आणि काळजी घेण्याचे आवाहन जिल्हा प्रशासनाकडून करण्यात आले आहे.