अहमदनगर : अहमदनगरच्या संगमनेर शहर पोलिस ठाण्यात (Sangamner city police Station) असलेल्या जेलमध्ये आरोपींनी वाढदिवस साजरा केल्याची घटना समोर आली आहे. याप्रकरणी अहमदनगर जिल्हा (Ahmednagar District) पोलीस अधीक्षक मनोज पाटील यांनी संगमनेर शहर पोलीस ठाण्यातील चार पोलिसांना निलंबित केलं आहे. मागील आठ दिवसापूर्वी आरोपींनी जेलमध्ये इतर कैद्यासमोवेत वाढदिवस साजरा केला होता.

याप्रकरणी संगमनेर शहर पोलीस ठाण्यातील सहाय्यक पोलीस उपनिरीक्षक रविंद्र कुलकर्णी, पोलीस हवालदार आनंदा भांगरे,पोलीस नाईक रामदास भांगरे,पोलीस हवालदार संजय साबळे, यांचं जिल्हा पोलीस अधीक्षक मनोज पाटील यांनी निलंबन करून सेवेतून बडतर्फ केलं आहे.

दरम्यान, संगमनेर शहर पोलिस स्टेशनमधील जेलमध्ये असणाऱ्या आरोपींनी वाढदिवस साजरा करण्यासाठी वाढदिवसासाठी लागणारा केक आणि साहित्य जेलमध्ये गेलंच कसं याचा ठपका या चार पोलिसांवर ठेवत त्या पोलिसांचं निलंबन करून सेवेतून बडतर्फ करण्यात आलं आहे. पोलिसांचं निलंबन झाल्यामुळे संगमनेर पोलिस दलामध्ये खळबळ उडाली आहे.

Edited By - Jagdish Patil