नांदेड : येथे एक दुख:द घटना घडली आहे. नांदेड-किनवट महामार्गावर ट्रक आणि टेम्पोचा भीषण अपघात झाल्याची दुर्देवी घटना घडलीय. हा अपघात हिमायतनगर तालुक्यातील करंजी फाटा येथे रात्री आठच्या सुमारास झाला. या अपघातात पाच जण जागीच ठार झाले असून चार जण जखमी झाले आहेत. जखमींना हिमायतनगरच्या शासकीय रूग्णालयात उपचारासाठी दाखल करण्यात आले आहे. (Nanded accident latest news update)

अपघातात मृत आणि जखमी झालेले नागरिक मजूर कामगार असून ते हिमायत नगरमधील रहिवासी आहेत. या अपघाताची माहिती मिळताच पोलिसांनी घटनास्थळी धाव घेवून जखमींना रुग्णालयात दाखल केले. अपघातात मृत पावलेल्या व्यक्तींच्या नावाची माहिती मिळाली नाहीय.

मिळालेल्या माहितीनुसार, हिमायत नगर येथे राहणारे कामगार काम करून घरी जायला निघाले असता काळाने त्यांच्यावर घाला घातला. नांदेड-किनवट महामार्गावर ट्रक आणि टेम्पोचा भीषण अपघात झाल्याने काळी वेळ वाहतूक ठप्प झाली होती.

हा अपघात इतका भीषण होता की वाहनांचा चक्काचूर झाला असून पाच जणांचा जागीच मृत्यू झाला. तर जखमी झालेल्या चौघांना हिमायतनगरच्या शासकीय रुग्णालयात दाखल करण्यात आले आहे. अपघातामुळं मृतांचा आकडा वाढण्याची भीती व्यक्त केली जात आहे.

Edited By - Naresh Shende