छत्रपती संभाजीनगर अन्न व औषध प्रशासनाच्या (FDA) विभागीय पथकाने बीड जिल्ह्यात खाद्यतेलातील भेसळ आणि अनियमिततेविरोधात मोठी कारवाई केली आहे. ६ आणि ७ ऑगस्ट रोजी MIDC बीड, माजलगाव आणि वडवणी परिसरातील ५ तेल रिपॅकिंग उद्योगांवर धाडी टाकण्यात आल्या. या कारवाईत तब्बल १ लाख १९ हजार १८७ किलो संशयित खाद्यतेल जप्त करण्यात आले असून, त्याची बाजारातील किंमत सुमारे १ कोटी ९४ लाख ५० हजार ९२२ रुपये आहे.

तपासणीदरम्यान या आस्थापनांमध्ये अनेक गंभीर अनियमितता आढळून आल्या. जुन्या आणि अस्वच्छ टिनचा पुन्हा वापर, एकाच टाकीतील तेल वेगवेगळ्या नावांनी विक्री करणे, तसेच रिफाइंड आणि अल्ट्रा रिफाइंड अशा नावाने तेलाची विक्री करून ग्राहकांची दिशाभूल केल्याचे प्रशासनाच्या निदर्शनास आले.

याशिवाय तेल साठवणुकीच्या टाक्यांची दुरवस्था, परिसरातील अस्वच्छता, आवश्यक तांत्रिक कर्मचाऱ्यांचा अभाव, नियमित लॅब टेस्ट न करणे आणि कर्मचाऱ्यांच्या वैद्यकीय प्रमाणपत्रांचा अभाव यांसारख्या त्रुटीही आढळल्या. कारवाईदरम्यान जप्त करण्यात आलेल्या तेलाचे २७ नमुने प्रयोगशाळेतील तपासणीसाठी पाठवण्यात आले आहेत.

५ ही आस्थापनांचे परवाने तात्काळ निलंबित करून त्यांचे कामकाज बंद करण्यात आले आहे. सहआयुक्त श्रीकांत करकळे आणि सहाय्यक आयुक्त नितीन मोहिते यांच्या मार्गदर्शनाखाली ही कारवाई करण्यात आली. प्रयोगशाळेच्या अहवालानंतर संबंधित आस्थापनांविरोधात पुढील कायदेशीर कारवाई करण्यात येणार असल्याची माहिती प्रशासनाकडून देण्यात आली.