रणजित माजगावकर, कोल्हापूर

एकीकडे सोने-चांदीचे दर गगनाला भिडले असताना, दुसरीकडे हौसेला खरंच मोल नसतं, याचा प्रत्यय कोल्हापुरात घडलेल्या एका घटनेतून आला आहे. सध्या लग्नसराईचे दिवस सुरु आहेत. अशातच एका मुलीच्या वडिलांनी आपल्या जावयासाठी तब्बल दीड किलो चांदीची कोल्हापुरी चप्पल बनवल्याची चर्चा आहे. या चप्पलची किंमत ४ लाख इतकी आहे.

मिळालेल्या माहितीनुसार, कोल्हापुरातील एका कुटुंबातील एका श्रीमंत वडिलांच्या लेकीचं लग्न होतं, मग काय लेकीबरोबर जावयाचीही हौस झालीच पाहिजे. याच हौसेखातर वधूपित्याने जावयासाठी चक्क चांदीची चप्पल बनवण्याचे काम सांगली जिल्ह्यातील एका सराफाकडे दिले. त्यानंतर हे काम कोल्हापूरमधील एका नामांकित चांदी कारागिराकडे सोपवण्यात आले. या कारागिराने आणि त्याच्या सहकाऱ्याने तब्बल आठ दिवस मेहनत घेऊन अगदी हुबेहूब कोल्हापुरी चप्पल तयार केली. या चप्पलची रचना पारंपरिक असून ती पाहताना खऱ्या चामड्याच्या चप्पलचीच आठवण येते.

या अनोख्या चप्पलची किंमत सुमारे चार लाख रुपये आहे. त्यासाठी सुमारे २२ हजार रुपयांची मजुरी देण्यात आली आहे. एवढ्या महागड्या चप्पलची चर्चा आता परिसरात जोरात सुरू आहे. विशेष म्हणजे, या कारागिराने याच महिन्यात पिण्याच्या पाण्यासाठी चार ते पाच किलो वजनाची चांदीची पिंपे देखील तयार केली आहेत. त्यामुळे या कारागिराच्या कौशल्याचीही सर्वत्र चर्चा होत आहे.

कोल्हापूर आणि सांगली भागात ‘धोंड्याच्या महिन्यात’ जावयाला खास भेट देण्याची परंपरा आहे. या परंपरेला जपत, पण त्यात थोडी वेगळी आणि श्रीमंती झलक आणत या कुटुंबाने चांदीची चप्पल भेट देण्याचा निर्णय घेतला. सोने-चांदीचे दर कितीही वाढले तरी हौस आणि प्रेम याला किंमत नसते, हे या घटनेतून पुन्हा एकदा सिद्ध झाले आहे. त्यामुळेच ही अनोखी चप्पल सध्या सोशल मीडियावरही व्हायरल होत आहे.