संजय जाधव, बुलढाणा | साम टीव्ही

बुलढाणा जिल्ह्यातील सिंदखेड राजा तालुक्यातील वरदडी गावात हृदयद्रावक घटना घडली. लग्नमंडपात मुलीचं कन्यादान करताना वडिलांचं हृदयविकाराच्या धक्क्याने मृत्यू झाला. लग्नमंडपात कन्यादानाचे विधी सुरू होते. त्याचवेळी नवऱ्यामुलीचे वडील खाली कोसळले. रुग्णालयात नेलं असता डॉक्टरांनी त्यांना मृत घोषित केले. या दुर्दैवी घटनेनं अख्खं गाव सुन्न झालं.

लग्नघरी सनई चौघड्यांचा मंजूळ सूर घुमत होता. वऱ्हाडी मंडळी, पाहुणे सगळ्यांच्या चेहऱ्यावर आनंद झळकत होता. लग्नमंडपात मंगलमय वातावरण असताना अचानक दुःखद घटना घडली. मुलीचा विवाह सोहळा पार पडला. नवऱ्या मुलीची काही वेळात पाठवणी होणार होती. कन्यादानाचे विधी सुरू होते. त्याचवेळी अचानक नवरीचे वडील खाली कोसळले. त्यांना रुग्णालयात नेण्यात आले. डॉक्टरांनी तपासून त्यांना मृत घोषित केले.

कुरूमदास कुंडलिक भुतेकर (वय ५०) असे मृत व्यक्तीचे नाव आहे. भुतेकर यांची कन्या नंदिनीचं लग्न नुकतंच जालना जिल्ह्यातील मंठा तालुक्यातील रहिवासी असलेला प्रदीप नानोटे यांच्याशी झालं. लग्नघरात सगळीकडं आनंदाचं वातावरण होतं. पण नियतीला काही वेगळंच मान्य होतं. मंगलाष्टकं झाली आणि त्यानंतर कन्यादानाच्या वेळी अचानक कुरुमदास यांच्या छातीत दुखायला लागलं.

कन्यादानावेळीच ते खाली कोसळले. उपस्थितांनी त्यांना जवळच्या रुग्णालयात नेलं. पण तोपर्यंत उशीर झाला होता. डॉक्टरांनी त्यांना तपासून मृत घोषित केलं. कुरुमदास यांची गेल्या डिसेंबरमध्येच बायपास शस्त्रक्रिया झाली होती. कुरुमदास यांच्या निधनानं गावावर शोककळा पसरली.