अहिल्यानगरच्या श्रीगोंद्यातून (मखरेवाडी) धक्कादायक बातमी समोर येत आहे. लग्नाचे आमिष दाखवून माजी नगरसेवकाने एका महिलेवर बलात्कार केला आहे. नऊ वर्षांपर्यंत वारंवार लैंगिक अत्याचार केल्याचं उघडकीस आलं. या प्रकरणी पीडितेनं सत्य बाहेर आणण्याचा प्रयत्न केला. मात्र, माजी नगरसेवकाच्या बायकोनं तरूणीला हात - पाय तोडून फेकून देईन, अशी धमकी दिली. हे प्रकरण समोर येताच श्रीगोंदा तालुका हादरला असून, माजी नगरसेवक आणि त्याच्या पत्नीविरोधात गुन्हा दाखल करण्यात आला आहे.

पीडित तरूणीनं दाखल केलेल्या तक्रारीनुसार, २०१६ ते ऑक्टोबर २०२५ पर्यंत या कालावधीत माजी नगरसेवक आरोपीनं तरूणीला आपल्या जाळ्यात ओढलं. लग्नाचे आमिष दाखवून वारंवार अत्याचार केला. लॉजमध्ये नेत शारीरिक संबंध ठेवले. आरोपीनं पीडितेच्या घरातही बळजबरीनं शरीरसंबंध ठेवले होते, अशी माहिती पीडितेनं दिली.

दरम्यान, आरोपीनं पीडितेचे खासगी फोटो व्हायरल करण्याची धमकी दिली. धमकी देत आरोपीनं तिच्यावर लैंगिक अत्याचार केला. पीडितेनं सत्य बाहेर आणण्यासाठी प्रयत्न केले. मात्र, तिला माजी नगरसेवकाने जीवे मारण्याची धमकी दिली. या प्रकरणाबाबतची माहिती पीडितेनं आरोपीच्या पत्नीला दिली.

आरोपीच्या पत्नीनं पीडितेला जीवे मारण्याची धमकी दिली. हात पाय तोडून फेकून देईन, अशी धमकी दिली. याच धमक्यांना कंटाळून पीडितेनं पोलीस ठाण्यात धाव घेतली. तसेच माजी नगरसेवक आणि पत्नीविरोधात तक्रार दाखल केली. या प्रकरणी श्रीगोंदा पोलिसांनी आरोपींविरोधात विविध कलमांन्वये गुन्हा दाखल केला आहे.