बुलढाणा : देशातील शेतकरी सातत्याने संकटात आहे. यावर्षी नैसर्गिक व सुलतानी संकटाने शेतकरी हतबल झाला आहे. असंख्य शेतकरी Farmers आजही आत्महत्या करीत आहेत. अतिवृष्टीने खरीप गेलं आता रब्बी पीक घेण्यासाठी शेतकऱ्याजवळ पैसा नाही आणि अशा संकटातही केंद्र व राज्य सरकार (Central and State Governments) शेतकऱ्यांकडे पुर्णत: दुर्लक्ष करीत असल्याचा आरोप स्वाभिमानी शेतकरी संघटनेचे रविकांत तुपकर (Ravikant Tupkar) यांनी केला आहे. तसेच या देशातील शेतकरी वाचवा अशी आर्त हाक तुपकरांनी यावेळी दिली आहे.

हे देखील पहा -

शेतकऱ्यांच्या मागण्या घेऊन बुलडाण्यात स्वाभिमानी शेतकरी संघटनेच्या वतीने भव्य एल्गार मोर्चा काढण्यात आला. या मोर्चामध्ये हजारो शेतकरी बांधव सामील झाले होते. शेतकऱ्यांना हेक्टरी 50 हजार रुपये द्या, ओला दुष्काळ जाहीर करा, लोकडाऊन मधील वीज बिल पूर्ण माफ करा , शेतकऱयांचे वीज कनेक्शन कापणे बंद करा या मागण्या घेऊन रविकांत तुपकर यांच्या नेतृत्वात शहरातील मोठी देवीला साकडे घालून जिल्हाधिकारी कार्यलयावर (Buldhana Collector's Office) मोर्चा धडकला. जिल्हाधिकारी मार्फत मुख्यमंत्री, कृषिमंत्री यांना मागण्यांचे निवेदन देण्यात आले आहे.

दरम्यान या मोर्चामध्ये असंख्य शेतकरी महिला सामील झाल्या होत्या , तसेच बैलगाड्या, ट्रॅक्टर घेऊन शेतकरी मागण्यांचे फलक हातात घेऊन मोर्चा मद्धे सरकार विरोधात घोषणाबाजी करीत सामील झाले होते.

Edited By - Jagdish Patil