Dhule News : राजकीय नेते सभेत अनेक किस्से सांगून उपस्थितांची वाहवा मिळवताना दिसतात. मात्र काही वेळा सभा गाजवण्याच्या नादात नेते असं काही बोलून जातात की त्याचे पडसाद उमटू लागतात.

भाजप नेते आणि राज्य सरकारमधील मंत्री विजयकुमार गावित यांचं वक्तव्य सध्या चर्चेत आलं आहे. मासे खाल्ल्याने डोळे ऐश्वर्या राय सारखे होतात असा अजब दावा विजयकुमार गावित यांनी केला आहे. धुळ्यातील एका कार्यक्रमात ते बोलत होते.

विजयकुमार गावित यांनी आपल्या भाषणात मासे खाण्याचे फायदे सांगताना म्हटलं की, ऐश्वर्या रायला बघितलं का? नियमित मासे खाल्ल्यामुळेच ऐश्वर्या रायचे डोळे सुंदर झाले. ती समुद्र किनारी राहणारी आहे. त्यामळे ती दररोज मासे खायची. तिचे डोळे बघितले ना कसे झाले? मासे खाल्ले तर तुमचेही डोळे तसेच होणार, असं विजयकुमार गावित यांनी म्हटलं. (Latest Marathi News)

यापुढे ते असंही म्हणाले की, मासे खाण्याचा आणखी एक फायदा आहे. मासे खाल्ले की बाईमाणूस चिकने दिसायला लागतात. डोळेपण तरतरीत दिसतात. माशाच्या तेलामुळे शरीराची त्वचाही चांगली दिसते. कुणीही बघितलं तर लगेच पटणार, असं गावितांनी म्हटलं. विजयकुमार गावित यांच्या या वक्तव्यामुळे वाद निर्माण होण्याची शक्यता आहे. (Political News)

कोण आहेत विजयकुमार गावित?

विजयकुमार गावित भाजप नेते आहेत. सध्या त्यांच्याकडे आदिवासी विकास खात्याची जबाबदारी आहे. याआधी ते राष्ट्रवादी काँग्रेसमध्ये होते. तिथे असतानाही त्यांनी विविध मंत्रीपदं भूषवलेली आहेत.