कैलास चौधरी

उस्मानाबाद - उस्मानाबाद जिल्हापरिषदेच्या अधिकाऱ्यांमध्ये आणि सदस्यांमध्ये चांगलाच वाद रंगला असून अधिकारी दोन टक्के कमिशन घेतल्याशिवाय कामे करत नाहीत असा आरोप सदस्यांनी केला आहे.

जि.प.सदस्य ज्ञानेश्वर गीते आणि मुख्य लेखा व वित्त अधिकारी सुरेश केंद्रे यांच्यामध्ये मागील आठवड्यात चांगलाच वाद झाला होता. यातून सर्व अधिकारी आणि कर्मचाऱ्यांनी काळया फिती लावत एक दिवसीय आंदोलन केले होते व गीते यांच्यावर कारवाई करण्याची मागणी केली होती.

हे देखील पहा -

मात्र, आता जिल्हा परिषद सदस्य ज्ञानेश्वर गीते यांनी देखील या अधिकार्‍यांवर भ्रष्टाचाराचे आरोप केले आहेत. माझ्या विरोधात करण्यात आलेले आंदोलन पूर्णपणे चुकीचे असून मी त्यादिवशी झालेल्या सर्व भांडणाचे रेकॉर्डिंग केले आहे असे म्हणत सर्व अधिकारी भ्रष्टाचारी आहेत असा आरोप त्यांनी केला आहे.

गीते यांनी अधिकाऱ्यांवर गंभीर आरोप केले असून, दोन टक्‍क्‍यांनी पैसे मिळविण्यासाठी जिल्हा परिषदेचे सीसीटीव्ही देखील या अधिकाऱ्यांनी बंद करण्यात आले आहेत असे त्यांचे म्हणणे आहे. तसेच जिल्हा परिषदेमध्ये कुठल्याही कामासाठी दोन टक्के कमिशनचे पैसे घेतल्याशिवाय अधिकारी कसलेच काम करत नसल्याचा आरोप ज्ञानेश्वर गीते यांनी केला आहे.

Edited By : Krushnarav Sathe