धुळे : अवैधरीत्या सावकारी करण्याचे प्रमाण वाढले आहे. याची माहिती मिळाल्यानंतर सहाय्यक निबंधक आणि पोलिसांनी छापेमारी करत कारवाई केली आहे. शिरपूर तालुक्यात एकाच वेळी पाच ठिकाणी अचानक छापेमारी केल्याने जिल्हाभरातील अवैधरीत्या सावकारी करणाऱ्यांचे धाबे चांगलेच दणाणले आहेत. 

धुळ्याच्या शिरपूर तालुक्यात हि कारवाई करण्यात आली आहे. शिरपूरचे सहाय्यक निबंधक आणि शिरपूर पोलिसांना प्राप्त झालेल्या तक्रारी नुसार तक्रारदाराने पाच जणांकडून एकुण ९ लाख ९५ हजार रुपये व्याजाने घेतले होते. या पैशांची परतफेड करुन देखील पैशांसाठी तक्रादराकडे घरी जाऊन अवैध सावकार तगादा लावत होते. वारंवार होत असलेल्या या त्रासाबाबत पोलिसात तक्रार दाखल केली होती.   

पाच पथकांद्वारे एकाच वेळी छापेमारी 

यातील काही अवैध सावकारांनी दहा टक्क्यांनी पैसे घेतल्याचे देखील तक्रारदाराने म्हटले आहे. या घटनेनंतर पोलीस आणि साहाय्यक निबंधक यांच्यावतीने पाच पथके बनवून एकाच वेळेला पाच अवैध सावकारी करणाऱ्यांच्या घरी छापेमारी करत घरझडती घेण्यात आली. यातील काही अवैध सावकारांच्या घरी, वेगवेगळ्या डायरी, कोरे चेक, पावत्या, स्टॅम्पसह इतर दस्तावेज मिळून आले आहेत. हे सर्व साहित्य पोलिसांनी जप्त केले आहे.  

सावकारांचे धाबे दणाणले 

दरम्यान धुळे जिल्ह्यात मोठ्या प्रमाणात अवैध सावकारी सुरु असल्याचे समोर आले आहे. यातच शिरपूर तालुक्यात एकाच वेळी पाची ठिकाणी धाडी टाकत अचानक घराची झाडाझडती झाल्याने अवैधरीत्या सावकारी करणाऱ्यांचे धाबे दणाणले आहे. अर्थात यासंदर्भात अवैध सावकारीचा मुद्दा पुन्हा उपस्थित झाला आहे.